“X-Seed” хэмээн нэрлэгдсэн 4000 метр өндөр тэнгэр баганадсан байшингийн зураг төслийг Японд зохиожээ. Цаасан дээр "босгочихоод байгаа" хүн төрөлхтөний түүхэн дэх энэ хамгийн том байшингийн хэлбэр нь Наран улсын бэлгэдэл болох Фүжияма уулын хэлбэрийг санагдуулж байгаа бөгөөд харин энэ уул 3776 метр өндөр юм. Төмөр бетон, шилээр барих 800 давхар байшин нь 500 мянгаас нэг сая хүртэл хүн багтааж чадах гэнэ. Барилгын өртөг нь 300-900 тэрбум ам. доллараар үнэлэгдэж байгаа ажээ.

Өндөр байшингийн бат бөх хана нь байшингийн нийт уртын дагуу даралт, цаг агаарын өөрчлөлтөөс хамгаалж чадах гэнэ. Гайхамшигт өндөр байшингийн өрөөнүүдэд бичил уур амьсгалыг барьж байхын тулд нарны энергийг ашиглахаар төлөвлөж байгаа бөгөөд амьдралыг хангах бүх системийг компьютероор хянаж байх ажээ.

Японд хоёр Фүжиямаг барих төлөвлөгөө энэ жил 17 нас хүрч байна. Одоо болтол дотоодын зах зээлд амжилттай ажиллаж байгаа  "Тайсэй кэнсэцү" гэдэг томоохон компани уг байшингийн төслийг зохиожээ. Тэнгэр баганадсан байшин барих төлөвлөгөө 1990 онд үнэхээр зохиогдсоныг тус корпорацынхан нотолсон байна. Гэвч "одоо уг төлөвлөгөө архивт тооцонд дарагдан хэвтэж байгаа" юм. "Бид энэ төлөвлөгөөг өөрсдөө хэрэгжүүлэх бодолгүй байгаа бөгөөд гаднаас ч одоо болтол хүсэлт ирээгүй" гэж компанийн төлөөлөгчид онцлон тэмдэглэжээ.