“Женко тур бюро” ХХК-ийн Төв аймгийн Эрдэнэ суманд Цонжинболдог толгойд барьж буй Их Эзэн Чингис хааны морьт хөшөө өнгөрөгч 09 сарын 26-ны баасан гаригт ашиглалтанд оржээ.

1177 онд Тэмүүжин дүү Хасар, Бэлгүдэй нарын хамт Тоорил хаанд булган дах бэлэглэн тусламж эрээд Бурхан Халдан руу буцах замдаа Цонжинболдог хэмээх уг толгой дээрээс ташуур олсон гэдэг. Энэхүү бэлгэ дэмбэрэлтэй явдал нь Их Эзэн Богдын толгойтны бөхийлгөн, тойгтныг сөхрүүлж дэлхийн талыг байлдан дагуулах эхлэл байсан хэмээн домогт өгүүлдэг аж. Монголчууд ташуураа бариад босоход дэлхийн дайдыг эзэлнэ гэсэн үг ч уг явдлаас үүдэлтэй.

Нутгийн олны аман яриа, домгоос үүдэлтэй тул “Женко тур бюро” компанийнхан цогцолборыг  уг газар байгуулжээ. “Эзэн Богд Чингис хааны хөшөө нь дэлхийн хамгийн том морьт хөшөө хэмээн тооцогдож байгаа” хэмээн уг цогцолборыг анх санаачлан барьж, байгуулсан дизайнер Д.Эрдэмбилэг ярьсан юм.

Морьт хөшөө нь суурийн хэсгийн байгууламжийн хамт 40 метр өндөр, суурийн хэсэг 10 метр, 30 метрийн диаметртэй дугуй хэлбэртэй. Дугуй суурийг  тойруулан Монголын 36 хааныг бэлгэдсэн 36 багана босгожээ. Морьт хөшөөг босгоход нийтдээ 250 тонн ган төмөр хийц орсон гэнэ. Зочид морины сүүлэн дэх цахилгаан шатаар дээш гарч, морины цээж хэсгээр дамжин, эмээлийн бүүргээр гарч, дэлэн дээрээс орчин тойрноо харах боломжтой. Зургаа авахуулахад арын фоныг нь тэнгэрт хааны хөрөг байхаар бодож байгуулжээ. Энэхүү өвөрмөц шийдэл олны сэтгэлд ихэд нийцэж байлаа. Хөшөөний доод хэсэгт жуулчдад зориулсан соёл, урлагийн болон бусад төрлийн үйлчилгээ явуулах гурван давхар төвтэй. 2012 онд бүрэн хэмжээгээр ашиглалтад орох энэхүү цогцолбор нь гадаадын жуулчид төдийгүй монголчуудын сонирхлыг хамгийн ихээр татаж байсан. Морьт хөшөөг тойрон 200 гаруй гэр буудлыг XIII зууны үеийн Монгол овог аймгуудын хэрэглэж байсан эртний тамганы хэлбэрээр байрласан байхаар төлөвлөжээ.

Цогцолборын төв хэсэгт гольфын иж бүрэн талбай, хиймэл нуур байгуулах аж. Байгууламжийн төв хойморт  Чингис хааны алтан ташуурыг залжээ. Хааны алтан ташуураас адис аван хийморь сүлдээ сэргээсэн олон хүн сэтгэл хангалуун буцсан юм.

TODAY