Завхан аймгийн Түдэвтэй сумын 11 жилийн дунд сургуульд 2008 оны 5-р сарын 10-ны шөнө гал гарч, тус сургуулийн хэд хэдэн байгууламж шатжээ.

Хэн нэгний буруутай үйлдлээс болж гал гарсан нь тогтоогдсон боловч одоогоор хэний буруугаас болсон нь нотлогдоогүй байна.

Энэхүү галд хичээлийн 1-р байр, спорт заал, сургалтын тоног төхөөрөмж, уурын зуух гээд нийтдээ 292,247,500 төгрөгний хохирол учирчээ.

Үүнтэй холбогдуулан Хаан банк тус сургуулийг сэргээн засварлах буюу шинээр барихад туслах аяныг санаачлан өөрийн банкны 5003401764 тоот хандивын дансыг нээжээ. Хандивын дансанд эхний дээж болгон Хаан банк Сангаас 10 сая төгрөг хандивлан байршуулсан батламжийг 5-р сарын 22-нд Түдэвтэй сумын 11 жилийн дунд сургуулийн захирал н.Чимэддоржид гардуулжээ.

Завхан аймгийн Түдэвтэй сумын 11 жилийн дунд сургуулийн барилга нь 70 гаруй жилийн түүхтэй ажээ.