Уг захирамжид Улаанбаатар хотын төвлөрсөн ус хангамжийн тэжээгдлийн мужийн дэглэм зөрчин хамгаалалтын бүсэд зөвшөөрөлтэй суурьшсан аж ахуйн нэгж, иргэдийг 2015 он хүртэл үе шаттайгаар, гэр амралтууд, зөвшөөрөлгүй суурьшсан болон газрын зориулалт өөрчилсэн иргэд, байгууллагыг 2009 онд багтаан нүүлгэж, газар чөлөөлүүлэх ажлыг зохион байгуулж хэрэгжүүлэх, усны эх үүсвэрийн хамгаалалтын бүс дэх иргэн, аж ахуйн нэгж, байгууллагын газар эзэмших, ашиглах эрхийн хугацааг дахин сунгахгүй байх, шинээр газар эзэмших, ашиглах эрх олгохгүй байхыг холбогдох албан тушаалтнуудад үүрэг болгосон байна.

Иймд дээрхи захирамж гарсантай холбогдуулан нийслэлийн тусгай хамгаалалттай Туул голын байгалийн нөөц газар болох Улаанбаатар хотын төвлөрсөн ус хангамжийн тэжээгдлийн мужийн хамгаалалтын бүс болон ундны усны эх үүсвэрийн тусгай хамгаалалтын бүсэд олгогдсон газарт Монгол Улсын хууль тогтоомжоор зөвшөөрөгдсөнөөс бусад зориулалтын хот төлөвлөлт, барилга байгууламжийн зураг төсөл боловсруулахгүй болохыг эрх бүхий бүх байгууллага, аж ахуйн нэгжүүдэд мэдэгдье. Зөрчил бүхий хот төлөвлөлт, барилга байгууламжийн зураг төсөлд магадлал хийгдэхгүй болно.