Улаанбаатар хотын агаарын бохирдлыг бууруулах санаачлагыг дэмжих үүднээс Зам, тээвэр, барилга хот байгуулалтын яам, Нийслэлийн Засаг даргын тамгын газартай хамтран хэрэгжүүлж буй ГТХАН-ийн Хотын хөгжлийг дэмжих хөтөлбөрийн хүрээнд Улаанбаатар хотод агаарын чанарыг хянах суурин станцын нээлтийн ажиллагаа 2008.12.12-ны өдөр БХБНААҮТ-ийн нэг цэгийн үйлчилгээний танхимд боллоо.

Мэдээлэл хүлээн авах төв, дамжуулах сүлжээ, программ хангамж бүхий 4 суурин станцыг Телевизийн антенн, Клиникийн нэгдсэн 2-р эмнэлэг, Нисэх болон Барилга, хот байгуулалт, нийтийн аж ахуйн үндэсний төвийн урд байршуулсан.

Суурин станц нь угаарын хий(СО), азотын ислүүд (NO/NO2/NOx), озон (O3), хүхрийн дутуу исэл, (SO2) болон тоосжилтыг (PM10/2.5/1) хэмжинэ. Түүнчлэн агаарын темпертур, харьцангуй чийгшил, агаарын даралт, салхины хурд, чиглэл зэргийг хэмжиж, контейнерийн доторх температур, сорьц авах систем, агаарын байдалд хяналт тавих юм.

Суурин харуулууд нь мэдээллийг хүлээн авах боловсронгуй системтэй бөгөөд энэ нь мэдээллийг цуглуулах, хэмжилтийн төхөөрөмжүүдийн өдөр тутмын тохируулга хийх, өгөгдөхүүнүүдийг төв компьютерт дамжуулах үүрэгтэй. Эдгээр суурин харуулуудыг ажиллуулах монгол талын 2 операторчныг Германд сургалтанд хамруулсан байна.