Шинэ он гаргаад орон сууцны үнэ өсөх хандлагатай байгаа талаар банк санхүүгийн мэргэжилтнүүд ярьж    байгаа. Энэ нь ч цаанаа нарийн учиртай ажээ. Төрөөс арилжааны банкуудад мөнгө байршуулж байгаа. Энэ мөнгө эргээд зээл хэлбэрээр хүмүүсийн гар дээр очно. Улмаар иргэд энэ мөнгийг орон сууцны зээлд өргөн ашиглана гэсэн судалгааг тэд хийгээд байгаа юм байна. Өнгөрсөн долоо хоногт УИХ Монгол Улсыг хөгжүүлэх сангаас 400 гаруй тэрбум төгрөгийг арилжааны банкуудад байршуулах шийдвэр гаргасан. Арилжааны банкууд төрөөс байршуулж байгаа энэ эх үүсвэрийг ашигтай салбар руу зээл хэлбэрээр олгоно гэдэгээ ч мэдэгдээд байгаа.

Иймд нэг хэсэг тогтвортой байсан орон сууцны үнэ ирэх сарын дундаас эхлэн эргэж бага хэмжээгээр өсөх хандлагатай байгаа юм байна. Гэхдээ дэлхийн санхүүгийн хямрал манай улсад хэр сөрөг нөлөөтэй тусахыг мэдэхгүй байгаа төдийгүй зарим хүн эсрэгээр сайн нөлөө үзүүлнэ гэж байгаа. Хэрвээ энэ үнэн бол орон сууцны ханш нэг их өсөхгүй ажээ.

Юутай ч нийслэлчүүдийн амжиргааны хамгийн чухал зүйл болох орон сууцны үнэ өсөхгүй байх нь нийслэлчүүд бидэнд ашигтай билээ. Бид энэ талаар үл хөдлөх хөрөнгө зуучийн зарим байгууллагатай холбогдож цөөн асуултанд хариу авсан юм. Байрны үнэ хурдацтайгаар өсч байсан энэ жилийн эхэн болон дунд үеийг бодвол 10 дугаар хойш байрны үнэ буурсаар одоо нэг бараг нэг дахин хямдраад байгаа гэнэ. Энэ нь банкууд орон сууцны зээлээ зогсоосон, иргэдийн худалдан авах чадвар буурсан, бэлэн мөнгөний хомсдол үүссэнтэй холбоотой гэж тэд тайлбарлаж байгаа юм.

Яг одоогоор орон сууцны ханш тогтвортой байгаа ч он гараад өсөж эхэлэхийг тэд үгүйсгэсэнгүй. Гэхдээ Зам тээвэр, барилга хот байгуулалтын яам болон Орон сууцны санхүүжилтийн кропрацийнхан барилгын үйлдвэрлэлд илүү хямд, чанартай технологи нэвтрүүлэх замаар орон сууцны үнийг хямдруулж одоогийн түвшинд нь барих бодлого барьж байгаа ажээ. Ирэх хавраас дотооддоо шинээр цементийн болон блок, тоосгоны үйлдвэрийг ч олноор байгуулах төсөл хөтөлбөрүүд дээрх газруудаар дамжин хэрэгжих шатандаа явж байгаа ажээ. Энэ бүхнээс үзвэл он гараад орон сууцны ханш нэг их өсөхгүй ажээ.