2008 ОНЫ МОНГОЛЫН ОНЦЛОХ 10 ҮЙЛ ЯВДАЛ
Barilga
2019-11-05
- Монгол Улсын Засгийн газраас Атрын III аяныг улсын хэмжээнд зохион байгуулж хэрэгжүүлсэн нь үр дүнгээ өглөө. Улсын хэмжээнд 205,8 мянган тонн улаан буудай хураан авсан нь өмнөх жилийнхээс 91,2 мянган тонноор илүү байв. Намрын ургац хураалтын дүнгээр Монгол Улс дотоодын хэрэгцээний үр тарианыхаа 50 хувийг, төмс, хүнсний ногооныхоо 49,6 хувийг хангах боломжтой болж, үр тариа, хүнсний ногоогоо дотооддоо бүрэн бэлтгэх боломжтой болохыг харууллаа.
- 2008 оны тавдугаар сард зүүн аймгуудад болсон гэнэтийн хүчтэй цасан шуурганаар 54 хүн амь үрэгдэж, олон мянган толгой мал хорогдож, улсад үлэмжхэн хэмжээний хохирол учруулав.
- 2008 оны зургадугаар сард УИХ-ын сонгууль болов. УИХ-ын 76 тойрогт 12 нам, нэг эвслээс 356 хүн нэр дэвшин өрсөлдөв. Сонгуульд нийт 7,2 тэрбум төгрөгийн зардал гарчээ. УИХ-ын сонгуульд МАХН 45 суудал авсан юм. Гэвч сонгуулийн үр дүнгээс хамааралгүйгээр МАХН, АН хамтарсан Засгийн газар байгуулав.
- 2008 оны 7 дугаар сарын 1- нд нийслэл Улаанбаатар хотноо нийтийг хамарсан үймээн самуун дэгдэж, улсын болон албан байгууллага, хувь хүмүүсийн үлэмж хэмжээний эд хөрөнгө шатаж, хэдэн зуун хүн бэртэж гэмтэн, таван хүний амь үрэгдсэн эмгэнэлт хэрэг явдал болов. Монгол Улсын Ерөнхийлөгчийн зарлигаар тус улсын түүхэнд анх удаа нийслэл Улаанбаатар хотод онц байдал тогтоов.
- 2008 оны 8 дугаар сарын 14. 2008 оны Бээжингийн Олимпийн наадамд Монголын баг тамирчид амжилттай оролцож, олимпийн наадмаас 44 жилийн турш монголчуудын хүсэн хүлээсэн алтан медаль гурвыг авч, мөн мөнгөн медальтан хосоороо төрөн гарсан нь ард нийтийн мартагдашгүй баяр бахдал боллоо.
- 2008 оны 9 дүгээр сарын нэгэнд Монголын Ерөнхий боловсролын сургуулиуд 12 жилийн боловсролын системд шилжин улсын хэмжээнд 42 мянган зургаан настнууд сургуулийн босго алхав. Энэ нь дэлхийн стандартад нийцүүлж Монгол Улсын боловсролын салбарт хийсэн томоохон шилжилтийн арга хэмжээ боллоо.
- 2008 оны 9 дүгээр сард. Нийслэл Улаанбаатар хотоос 53 км зайд орших Цонжин болдог хэмээх эртний түүхт газар 10 давхар байшинтай тэнцэхүйц өндөр Чингис хааны морьтой хөшөөг босгов. Уран барилгын хосгүй бүтээл болсон энэ хөшөө нь дэлхийн хамгийн том морьт хөшөө болжээ.
- 2008 оны 10 дугаар сард стратегийн ач холбогдолтой ашигт малтмалын зарим ордыг ашиглах Хөрөнгө оруулалтын гэрээ байгуулах эрхийг УИХ-аас Засгийн газарт олгов.Энэ тухай УИХ-аас баталсан тогтоолоор Таван толгойн коксжих нүүрсний орд газрын 51, Оюутолгойн зэс, алтны орд газрын 34-өөс доошгүй хувийг Монголын тал эзэмших нөхцөлтэйгээр Хөрөнгө оруулалтын гэрээг гадаад, дотоодын хөрөнгө оруулагчидтай байгуулах эрхийг Засгийн газарт олгосон юм. Монгол Улсын хөгжилд чухал байр суурь эзэлдэг Монгол-Оросын хамтарсан Уулын баяжуулах Эрдэнэт үйлдвэрийн 30 жилийн ойг өргөн тэмдэглэж өнгөрүүлэв.
- 2008 оны 12 дугаар сард дампуурахын ирмэгт тулж очсон "Анод" банкинд Монгол банк бүрэн эрхт төлөөлөгчөө томилон ажиллуулж, шуурхай арга хэмжээ авсны дүнд үйл явдлыг тогтворжуулж чадав. Монголын томоохон арилжааны банкнуудын нэг болох "Анод" банкны энэхүү хямрал нь монголын банк санхүүгийн салбарт томоохон цочрол өгсөн үйл явдал боллоо.
- 2008 оны 12 дугаар сард 2008 оны мал тооллогын урьдчилсан дүн гарч 42,2 сая толгой мал тоологдсон нь Монгол Улсын түүхэнд хамгийн олон тоо толгойд хүрсэн байна.
Тайлбар:
Монгол Улсад болж өнгөрсөн 10 том үйл явдлыг 2008 оны 12 дугаар сарын 24-ний байдлаар гаргасан болно.
Монцамэ