Тус компанийн Төлөөлөн удирдах зөвлөлийн хуралдаан 2009 оны 01 дугаар сарын 16 -ны өдөр компанийн үйлдвэрлэлийн өнөөгийн байдал, тулгамдсан асуудлын талаар хэлэлцсэнтэй холбогдуулж Хөтөл тосгоныг дулаанаар тасралтгүй найдвартай хангах, цаашид дулааны станцын харьяалал, түүнээс хүлээж буй алдагдалын асуудлыг шийдвэрлэх тухай хэлэлцлээ.     

Барилгын компануудын үйл ажиллагаатай холбоотойгоор цементийн борлуулалт зогсч санхүүгийн хүндрэлтэй байдлын улмаас Хөтөлийн “Цемент шохой” ХК нь дулааны станцын хэрэгцээт нүүрсээ худалдан авах, ажилтан нарынхаа цалин хөлсийг олгох боломжгүй байдалд хүрээд байна. Өнөөдрийн байдлаар Дулааны станц 4-5 хоногийн нүүрсний нөөцтэй бөгөөд цаашид тосгоноороо хөлдөх аюул тулгарч байгаа тул барилгын компануудтай байгуулсан гэрээгээ дүгнэн, тэднээс авах авлагаа 2 дугаар сард багтааж барагдуулах, энэ ажлыг Барилгын материал үйлдвэрлэгчдийн холбоотой хамтарч хийж, гүйцэтгэлийг Төрийн өмчийн хороо, Төлөөлөн удирдах зөвлөлд тайлагнаж ажиллахыг үүрэг болгожээ.

Цаашид Дулааны станцын харьяалал, хүлээж буй алдагдалын асуудлаар аймаг, сум, холбогдох яамд , Төрийн өмчийн хороогоор дамжуулж Засгийн газарт асуудлаа оруулж шийдвэрлүүлэх асуудлыг цаг алдахгүй хөөцөлдөж шийдвэрлүүлэх талаар ТУЗ-ийн дарга Б.Бямбажав холбогдох ажилтнуудад үүрэг болголоо.

2009 оны 01 дүгээр сарын 19 өдөр БХБНААҮТ, МБМҮХолбоо хамтран Барилгын материал үйлдвэрлэгч компаниудын захирал, санхүүгийн ажилтнуудтай уулзан барилгын материалын үйлдвэрүүдэд тулгамдаж байгаа асуудал, үйлдвэрлэлт , борлуулалт зах зээл, цаашид шийдвэрлүүлэх асуудлуудын талаар санал бодол солилцон ярилцлага зохион байгууллаа. Уг уулзалт ярилцлагад   МВС ХХК, Ханан групп, Ган хийц ХХК, Стройка ХХК, Хөнгөн бетон ХХК, Эрдэс бетон ХХК, Стройинвест зэрэг ХХК-ууд оролцов.

“Хөтөл цемент шохой“ ТӨХК-ийн одоогийн нөхцөл байдлыг танилцуулан өр авлагатай компаниуд төлбөр тооцоогоо хийж, хүндрэлтэй байдлаар гарахад нь туслан хамтран ажиллахыг зөвлөв.