Хот төлөвлөлт буруу, инженерийн шугам сүлжээ байхгүй, хуулийн хэрэгжилт, зохицуулалт тааруухан байгаа гэх мэт шүүмжлэл байнга гарах болсон. Түүнчлэн зөвшөөрөлтэй үгүй нь мэдэгдэхгүй барилга, байшин олноор баригдаж байгаа нь хот төлөвлөлтийн бодлого алдагдуулах болсныг ажлын хэсгийн гишүүд анхааралдаа авч байгаа юм. Тэгээд ч энэ талаар дээр дурьдсан холбогдох албаны хүмүүстэй уулзаж зарим зүйлийг тодруулав. Хотын 2030 он хүртэлх ерөнхий төлөвлөгөөнд гэр хороолол, үйлчилгээний газар, дэлгүүр хаана байх вэ гэх мэт зүйлийг тусгасан гэдгийг Барилга, хот байгуулалт хариуцсан нийслэлийн Засаг дарга Б.Мөнхбаатар танилцууллаа.

Иргэд амандаа орсон үнэ хэлдэг нь хуулийн зохицуулалттай холбоотой

Ажлын хэсгийн ахлагч Ш.Сайхансамбуу "Улаанбаатар хотын төвд Гандангийн дэнж, 100 айл гэсэн хоёр том гэр хороолол байна. Ерөнхий төлөвлөлтийн дагуу дээрх хоёр газарт хороолол босох уу. 100 айлын ойролцоо загвар муутай олон давхар байшин харсаар байтал баригдчихлаа. Гандангийн дэнжийн дэргэдүүр сүм, дуган, жижиг буудал олноор баригдах болсон. Энэ бүхэн ер нь зөвшөөрөлтэй баригдаж байгаа юу" хэмээн асуусан. Харин Б.Мөнхбаатар "Хот маань анхнаасаа төлөвлөлтгүй байсан. Орон сууц, үйлчилгээний байгууллага гээд бүгд холилдон баригдсан учир үүнийг өөрчлөхөд бэрхшээл багагүй бий. Гэхдээ ерөнхий төлөвлөгөөнд хуулийн хүрээнд гэр хорооллын асуудлыг анхааралтай авч үзэж тусгасан байгаа. Иргэдийн хувьд нэгэнт газраа өмчилж авсан учир үүнтэй холбоотой маргаан их бий. Гэтэл үүнийг хууль эрхзүйн орчин байхгүй. Харин Гандангийн дэнжийн тухайд ойр орчимд нь өндөр барилга барихгүй, эртний уламжлалт хэв шинжийг хадгалсан загвартай, 3-4 давхар барилга барих нь зүйтэй хэмээн ерөнхий төлөвлөгөөнд тусгасан. Ер нь бол иргэд өөрсдөө газар авч байшин бариад байгаа юм" хэмээн хариуллаа.

Түүнээс гадна, байшин барилга нэмэгдсэнтэй холбоотойгоор инженерийн шугам, сүлжээний асуудал хүнд байгааг ч холбогдох албаныхан ярьсан юм. Гэр хорооллын айлыг шилжүүлье гэхээр айлууд амныхаа зоргоор мөнгө хэлж, хүндрэл учруулах явдал их тохиолддог тухай ч тэд сануулж байлаа. Зарим айл 400-500 сая төгрөг нэхэж байгаад эцэстээ 30,40 сая төгрөг хүртлээ ярилцаж тохиролцсоны дараа сая шилждэг нь Үл хөдлөх хөрөнгө үнэлэх хуулийн зохицуулалттай холбоотой гэдгийг гишүүдэд сонордуулав.

"Дисней Лэнд" баригдана

Энэ асуудал яригдаад багагүй хугацаа өнгөрч байна. Өнгөрсөн зун хүүхдүүд тоглож наадах газаргүй гэртээ өнжсөн. Харин "Дисней Лэнд" баригдана хэмээн хашаа татсан талбай хэд хэдэн хэсэг болон хуваагдаж хэл ам гарч байлаа. УИХ-ын гишүүн Д.Хаянхярваа уг асуудлын талаар лавлан, "Хүүхдийн паркийг "Дисней Лэнд" болгоно гэсэн. Гэтэл өнөөг хүртэл барилгын ажил нь ч эхлээгүй, харин ч газрыг нь аваад дуусах байдалтай болоод байгаа. Үүнд ямар нэг арга хэмжээ авсан зүйл бий юу" гэв. Нийслэлийн газрын албаны дарга Ц.Сандуй түүний асуултад хариулахдаа ""Дисней Лэнд" баригдана. Одоогийн байдлаар тоглоомууд нь ирсэн байгаа.

Хавар, дулаарахаар барилгын ажил эхэлнэ гэдгийг холбогдох хүмүүс нь хэлсэн. Газрыг авч байгаа тухайд, өмнө нь 7-8 газрын зөвшөөрөл байсныг хүчингүй болгосон. Ганц компани үлдсэн. Тэд шүүхээр яваад ялсан юм" гэсэн тайлбарыг өглөө. Ингээд Нийслэлийн газрын албаны даргын ярьснаар "Дисней Лэнд" ирэх хавраас баригдаж эхлэх бололтой.

Ийнхүү ажлын хэсгийн гишүүд зарим зүйлийг тодруулсны эцэст газрын зохицуулалттай холбоотой гардаг бэрхшээлийг хэрхэн зохицуулах боломжтой байгаа талаар тэдний санал, хүсэлтийг сонсох хүсэлтэй байгаагаа анхаарууллаа. Түүнчлэн ажлын хэсэг зөрчилтэй байгаа хэд хэдэн газраар ирэх долоо хоногт шалгалт хийх тухайгаа дарга нарт сануулав.