Засгийн газрын үйл ажиллагааны хөтөлбөрийн хүрээнд 2009-2012 онд хамтран ажиллах гэрээнд гарын үсэг зуржээ. Нийслэлийн хүн амын эрүүл мэндийг дэмжих, бие бялдрыг чийрэгжүүлэх, биеийн тамир спортоор хичээллэх орчин нөхцлийг бүрдүүлэх, эмнэлгийн тусламж үйлчилгээг жигд хүртээмжтэй, чанартай үзүүлэхэд энэхүү гэрээний гол агуулга оршиж байгаа бөгөөд талууд эрүүл мэнд, биеийн тамир, спортын байгууллагын тогтолцоог боловсронгуй болгоход хамтран ажиллах юм.

Нийслэл, дүүргүүдэд биеийн тамир, спортын төрөлжсөн цогцолборыг үе шаттайгаар барьж байгуулах, иргэд биеийн тамир, спортоор хичээллэх, дасгал хөдөлгөөн хийх, бие бялдраа чийрэгжүүлэх боломжтой ногоон байгууламж бүхий ил талбайг хороолол бүрт байгуулах, эрүүл мэндийн байгууллагуудын ажиллагсдад зориулсан орон сууцны барилгуудын газар олголтын асуудлыг “Улаанбаатар хотыг 2020 он хүртэл хөгжүүлэх ерөнхий төлөвлөгөө”-ний хүрээнд судалж шийдвэрлэх зэрэг олон асуудлыг гэрээнд тусгажээ. Мөн нийслэлд 300 ортой төрөх эмнэлэг, Баянгол дүүргийн эрүүл мэндийн нэгдлийн барилга, эмнэлгийн хог хаягдлын устгалын цэгийг шинээр барих, эмнэлгийн яаралтай тусламж, шуурхай байдлыг хангах үүднээс дүүрэг хороодын хаягжилт болон гэрэлтүүлгийг сайжруулах зэрэг Улаанбатар хотын иргэдийн эрүүл мэндтэй холбоотой цөөнгүй асуудлыг хамтарч шийдвэрлэхээр боллоо гэж Нийслэлийн Хэвлэл мэдээллийн албанаас мэдээллээ.