Өөрөөр хэлбэл энэ шуурхай зөвлөгөөнөөс эхлэн Хяналт, шинжилгээ, үнэлгээний хэлтэс тус ажлыг бүхэлд нь хариуцаж, удирдан зохион байгуулж байхаар боллоо.

Бие даасан хэлтэс хариуцдаг болсон энэхүү зөвлөгөөн өөр арга барилаар явагдана гэдгийг хотын мэр онцолж байсан юм. Өнөөдөр өгсөн үүрэг даалгаврыг маргаашнаас эхлэн бодит ажил хэрэг болгож газар дээр нь ажиллах үүднээс ийнхүү нэг хэлтэст хариуцуулж байгаа нь энэ аж. Энэ тал дээр хотын мэр нэлээд хатуу байр суурьтай байгаа бөгөөд эхэлсэн, хийсэн ажил бүрийн үр дүн хамгаас чухал гэдгийг нутгийн захиргааны байгууллагуудын удирдлагуудад анхааруулж байлаа. Тиймээс ч энэ удаагийн шуурхай нэлээд шүүмжлэлийг дагуулснаас гадна ажлын хариуцлагыг өндөржүүлэхийг шаардсан уур амьсгалтай болсон юм. Мөн сарын эхний шуурхайг холбогдох бүх хүмүүс оролцож, нийтээрээ хийх бол зарим тохиолдолд хоёр дахь зөвлөгөөнийг Засаг даргын орлогч нар өөрсдийн хариуцсан салбараараа хийх аж. Шуурхай зөвлөгөөн цааш үргэлжилж “Харьяа газар, байгууллагууд өөрсдийн хийх ёстой ажлаа хийсэн гэж тайлан болгож ярьдгаа больё. Хамгийн гол нь тухайн ажлыг хийгээд ямар үр дүнд хүрэв гэдэгт л онцгой анхаарал хандуулж ажиллах хэрэгтэй” гэдгийг Хяналт, шинжилгээ, үнэлгээний хэлтсийн дарга Ш.Наран онцолж байсан юм.

Засаг дарга Г.Мөнхбаяр өнгөрсөн шуурхай зөвлөгөөн дээр нийт арван үүрэг даалгавар өгсөн бөгөөд тэдгээрийн биелэлт, явцын талаар Ш.Наран дарга танилцуулж мэдээлэл хийсэн юм. Тухайн байгууллага ямар ажил хариуцах, хэн ямар ажил гүйцэтгэхийг тодорхой болгосон ажлын байрны тодорхойлолт, дүрэм журам зэрэг дотоод зохион байгуулалтын ажил хийгдэж байгаа гэнэ. Хэрэв өнөөгийн ийм цалгар байдлаар бол нийслэлийн харьяа газар, хэлтэс, байгууллагууд дотоод зохион байгуулалтын ажилтайгаа зууралдсаар байтал эхний улирал дуусч магадгүй нь. Тиймээс ч энэ ажлыг шуурхай хийж дуусгах хэрэгтэйг санууллаа. Мөн шуурхай болгон дээр яригддаг мөнхийн сэдэв болох халтиргаа, гулгаа ч энэ удаа үлдсэнгүй. Хариуцдаг газраас нь хийсэн ажлын тайлангаа ирүүлсэн ч хамгийн чухал нь байгууллага, аж ахуйн нэгжтэй хамтарч ажиллах хэрэгтэйг онцолж байсан юм. Өөрөөр хэлбэл тухайн байгууллага өөрийн ойролцоо 50 метр газрын халтиргааг цэвэрлэх ёстой бөгөөд энэ ажлыг эрчимжүүлэхийг холбогдох газарт анхааруулж байв.

Ийнхүү ихэнх ажил хийгдэж байгаа, дуусаагүй гэсэн үр дүнтэй байгаа нь үүргийн биелэлтээс харагдаж байв. Мөн энэ үеэр ХХI зуун цаасаар мэдээлэл түгээх үе биш тиймээс нийслэлийн бүхий л байгууллага мэдээ мэдээлэл, харилцаа холбоогоо онлайн хэлбэрт оруулахыг онцолж байсан юм. Ингэж үүргийн биелэлтийг танилцуулсны дараа санал, асуулт хариулт үргэлжилсэн юм. Удахгүй болох гэж байгаа Цагаан сарыг угтаж нийслэлчүүдэд чанартай бүтээгдэхүүн хүргэх үүднээс цагаан идээ, махны үзэсгэлэн худалдааг дүүрэг бүрт зохион байгуулахаар болсон. Энэ ажил хэр явагдаж байгаа талаар хотын мэр тодруулж бараг л гэнэтийн шалгалт хийсэн юм. Харин энэхүү шалгалтад Мэргэжлийн хяналтын газар, Чингэлтэй дүүрэг навс унасан гэж болно. Чингэлтэй дүүрэгт гаргах үзэсгэлэн худалдааны байрны асуудлыг тус дүүрэг, Мэргэжлийн хяналтын газар хоёр хоорондоо ойлголцож, зохицуулж чадаагүйгээс болж хотын даргаас зэмлэл хүртсэн юм. Хотын ажилд хөндлөнгийн байр сууринаас хандаж, сэтгэл гарахгүй байгаа нь хариуцлага тооцох асуудал гэдгийг онцгой анхааруулж байлаа.

Төрийн үйлчилгээг иргэдэд хүргэхийн тулд шат шатандаа уялдаа холбоотой ажиллах хэрэгтэй бөгөөд энэ удаа Чингэлтэй дүүрэг, Мэргэжлийн хяналтын газар хоёр ажилдаа хайнга хандсанаа харуулаад авлаа. Нэг нь манайх зөвхөн хяналт тавина гэж өөрийгөө хамгаалж байгаа бол нөгөө нь хаана байрлуулахаа мэдэхгүй будилсаар байтал хөдөөнөөс зорьж ирсэн малчдын авчирсан бүтээгдэхүүн муудах аюулд хүрч болзошгүй нь. Төрийн үйлчилгээ гэдэг зөвхөн иргэдийн төлөө чиглэгдсэн байх ёстой. Харин өнөөдөр зарим нэг хариуцлагагүй байгууллага, дарга нараас болж энэ үүрэг өөрчлөгдөөд байх шиг. Үүний бас нэг жишээг нийслэлийн Тамгын газрын дарга Ц.Болдсайхан шүүмжилж дүүрэг гэсэн вант улс байгуулахгүй шүү гэдгийг анхааруулсан юм. “Нэг гарын үсгийн ард асар их хариуцлага дагаж явдаг. Тиймээс суудал бүр дээрээ томорч, эрх мэдэл ханхлуулж, дур дураараа аашилдгаа болих хэрэгтэй. Улаанбаатар гэдэг нэг л хот. Есөн хот биш” гэдгийг дүүргийн Засаг дарга нарт хатуухан хэлээд авсан.

Харин дараа нь Засаг даргын нэгдүгээр орлогч Б.Баатарзориг “Захирагчийн Ажлын Албанд өгсөн үүргийн биелэлт гэж байдаггүй. Доторх ажил нь сайн байж болно. Гадагшаагаа харьцах хэрэгтэй байна. Нийслэлийн Засаг даргын Тамгын газар, Захирагчийн Ажлын Алба хоёр бол нэг тэрэгний хоёр дугуй. Тиймээс уялдаа холбоотой ажиллах нь чухал” гэдгийг шүүмжлэл, санал хослуулан хэлсэн юм. Ийнхүү ажлын хариуцлага алдсан хүмүүсийн нүүрийг нь улайлгаж, бас ч үгүй дургүйг нь хүргэсэн шүүмжлэлүүд ар араасаа цуварсаар шуурхай өндөрлөх тийшээгээ хандсан юм. Мөн хэвлэл мэдээллийн хэрэгслийн шүүмжлэлд эмзэглэх биш харин ч ажил хэрэгтээ тусгаж, алдаа дутагдлаа засах хэрэгтэй нь энэ үеэр харагдаж байлаа. Эцэст нь хотын дарга үүрэг даалгавраа, шүүмжлэлтэй хослуулан өгч, хариуцлагатай ажиллахыг шаардаад ирэх 14 хоногт анхаарч ажиллах чиг өгөв.

• Байгаль орчин, аялал жуучлалын яам, Түлш, эрчим хүчний яамтай хамтран ажиллах гэрээ байгуулах бөгөөд үүний бэлтгэл ажлыг хангах
• Орлогч дарга нар эдийн засгийн хямралын үед хэрхэн хамтран ажиллах талаар байгууллага, аж ахуйн нэгжтэй уулзах ажлыг хариуцан хийх
• Цагаан сараар гарах нэмэлт үйлчилгээний хуваарийг гаргаж, хэвийн ажиллах бүхий л бололцоог бүрдүүлэх
• Нийслэлийн бүхий л үйлчилгээ, мэдээ мэдээллийг онлайн хэлбэрт оруул. Нэг дүүргийн иргэн нөгөө дүүргээс бичиг авах гэж явахгүй байх боломжийг бүрдүүлж, вэб сайтуудыг байнгын ажилллагаатай болгох
• Хороодын орон тоо, бүтцийг бэхжүүлж, хороодыг боловсролтой залуу хүнээр толгойлуулах
• Орлогч нар олон улсын зээл тусламжаар хэрэгжиж байгаа, хэрэгжих гэрээ хэлэлцээрүүдийг танилцуулах.
• Нийслэлд их цэвэрлэгээ хийх хэрэгтэй байна. СӨХ, орц болгонд цэвэрлэгээ хийлгэх үүргийг өглөө.