Монгол Улсын Засгийн газар, Европын Холбооны Комисс, Их Британийн Хүүхдийг Ивээх Сангийн хамтарсан хөрөнгө оруулалтаар 75 хүүхдийн багтаамжтай   цэцэрлэг энэхүү хорооны сэрүүн дэнжид жил гаруйн дотор баригдаж бяцхан эздээ хүлээн авахад бэлэн болжээ.

 2006 оноос эхэлсэн 2.5 тэрбум төгрөгийн өртөг бүхий “Сургуулийн өмнөх болон бага боловсролын чанарыг сайжруулах нь” багц төслийн хүрээнд баригдсан тав дахь цэцэрлэг нь энэ ажээ. Цэцэрлэгийн барилгын нийт өртөг 176.3 сая төгрөг бөгөөд 61 сая төгрөг буюу 34.6 хувийг Монгол Улсын Засгийн газар, үлдсэн 115.3 сая төгрөг буюу 65.4 хувийг Европын Холбооны комисс болон Их Британийн Хүүхдийг Ивээх Сангаас санхүүжүүлжээ.Түүнчлэн ангиудын тохижилт, хүүхдийн ном, гарын авлагаар хангахад Хүүхдийг Ивээх Сангаас 3.8 сая төгрөгийн хөрөнгө оруулалт хийсэн байна.

Нээлтэд оролцсон Европын Холбоо, Европын Комиссын Төлөөлөгчийн Газрын Дэд Тэргүүн, Сайдын зөвлөх Майкл Пульш:

Одоогоос хоёр жилийн өмнө Монголд ирж байхад энэ цэцэрлэг дөнгөж сууриа тавьж байсан. Өнөөдөр ингээд дутуу юмгүй сайхан цэцэрлэгийн нээлтэд оролцож байгаадаа баяртай байна. Бид бүхний хүч хөдөлмөрөөр боссон энэ өргөөг цааш нь амжиллтай ажиллуулж чадна гэдэгт танай улсын БСШУЯ-нд найдаж байна. Манай Европын холбооны комиссын хөрөнгө оруулалт ихэвчлэн хөдөөд чиглэгддэг. Энэ удаа Монголд хэрэгжүүлэх төслийн судалгаа, шинжилгээний баг хүрэлцэн ирээд байгаа. Тэд энэ жил болон ойрын хугацаанд манай зүгээс   ямар салбарт хөрөнгө оруулалт хийхээ судалж боловсруулах юм гэлээ.

Цэцэрлэгийн нээлтэд оролцсон БСШУЯ-ны Бага дунд боловсролын газрын дарга Ц.Энхбат:

Манай улсад өнөөдөр сургуулийн өмнөх боловсролд хамрагдах ёстой 130 гаруй мянган хүүхэд байгаагаас 60 хувь нь цэцэрлэгт хамрагдаж байна. Засгийн газраас боловсролын салбарыг хөгжүүлэх үндсэн чиглэлд заахдаа 2015 он гэхэд сургуулийн өмнөх насны хүүхдийг 99 хувь цэцэрлэгт хамруулах зорилттой ажиллаж байна. “Сургуулийн өмнөх болон бага боловсролын чанарыг сайжруулах нь” багц төслийн хүрээнд Сургуулийн өмнөх боловсролын тухай хууль боловсруулан батлуулах, хувилбарт сургалтын стандарт боловсруулах, гэр цэцэрлэгүүд байгуулан явуулын багш бэлтгэх зэрэг ажил амжилттай хийгдлээ. Түүнчлэн цэцэрлэг, сургуулийн ариун цэврийн өрөөний нөхцлийг сайжруулах, хөгжлийн бэрхшээлтэй хүүхдэд зориулсан тусгай орчин бүрдүүлэх ажил долоон аймаг хоёр дүүргийн 15 цэцэрлэг, 77 сургуульд амжилттай хийгдлээ гэв.

Тус хорооны Засаг дарга Н.Дорждулам:

Урьд нь Бугын сангийн аж ахуй байсан суурин дээр энэ хороо байгуулагдаад есөн жил болж байна. Манай энд 2005 онд Швейцарийн иргэн Маргарита Рошийн тусламж, санаачилгаар 25-30 хүүхэдтэй гэр цэцэрлэг ажиллаж байсан бол өнөөдөр хоёр давхар энэ сайхан байртай болсондоо баяртай байна. Бяцхан иргэдийн төлөө энэ буянтай ажлыг хийж гүйцэтгэхэд туслалцаа үзүүлсэн бүх хүмүүст талархаж байна. Энд сурч, боловсрох хүүхдүүдийн дунд ирээдүйд эх орондоо ихийг хийж бүтээгчид байгаад итгэлтэй байна” гэлээ.

Өлзийт хороо 2000 онд анх байгуулагдсан бөгөөд 2500 гаруй оршин суугчдын дийлэнх нь мал аж ахуй, газар тариалан голлон эрхэлдэг байна. Энд цэцэрлэгт хамрагдах ёстой 200 гаруй хүүхэд байгаагаас 80 хүүхэд л цэцэрлэгт оржээ. Тэдний 70 хувь нь эмзэг бүлгийн хүүхдүүд байна.

Энэхүү цэцэрлэг нээгдснээр 17 хүний ажлын байр бий болжээ. Өмнө нь төслийн хүрээнд Сүхбаатар, Ховд, Сэлэнгэ аймаг, нийслэлийн Чингэлтэй дүүрэгт мөн 75 хүүхдийн багтаамжтай ийм цэцэрлэг ашиглалтад орсон байна.     

Та бүхэн орчин тойрондоо болж буй шинэ содон, сонирхолтой, анхаарал татам үйл явдлын талаархи мэдээллийг бидэнд info@barilga.mn мэйлээр илгээж байна уу.