Зөвлөлийн гишүүд яамдын удирдлагуудаар хүрээгээ өргөжүүлэв

Нийслэлийн Засаг даргын зөвлөлийн хурлын бүрэлдэхүүн нэлээд шинэчлэгдэж бас өөр өөр салбарын төлөөллөөр сэлгэлт хийсэн байх юм. Зам тээвэр, барилга, хот байгуулалтын яамны дэд сайд, Хүнс, хөдөө аж ахуй, хөнгөн үйлдвэрийн яам болон Эрүүл мэндийн яамны Төрийн захиргааны удирдлагын газрын дарга, нийслэлийн Засаг даргын дөрвөн орлогч нар нийслэлийн Засаг даргын зөвлөлийн бүрэлдэхүүнд багтаж байна. Мөн ирэх дөрвөн жилд энэхүү зөвлөлийн багт Улаанбаатар хотын Ерөнхий менежер Ч.Бат, нийслэлийн Засаг даргын Тамгын газрын дарга Ц.Болдсайхан, Улаанбаатар бүсийн зөвлөлийн нарийн бичгийн дарга Г.Галсанпунцаг, нийслэлийн Засаг даргын Боловсон хүчний асуудал хариуцсан зөвлөх Х.Самбаа, Санхүү, төрийн сангийн хэлтсийн дарга Ж.Эрдэнэбилэг, Татварын газрын дарга С.Энхбаатар, Чингэлтэй дүүргийн Засаг дарга Д.Ганболд болон нийслэлийн Ерөнхий прокурор, нийслэлийн Шүүхийн дарга нар ажиллана. Нийслэлийн Засаг даргын зөвлөлийн энэ удаагийн хурал нэлээд ажил хэрэгч уур амьсгалтай болж өнгөрлөө. Ажлын нэг өдрийг бүхэлд нь зарцуулсан уг хурлаар нийслэлийн хэрэгжүүлэгч агентлаг, хэлтэс, дүүрэг, хороодын өнгөрсөн оны ажлын дүнг хэлэлцэв. Мөн нийслэлийн 370 жилийн ойн хүрээнд ямар ажил хийх вэ гэсэн төлөвлөгөөг батлан гаргалаа.

Улаанбаатар хотын ундны усны хамгаалалтын бүсийг тэмдэгжүүлжээ. Түүнчлэн хүнд даацын автомашинд олгох тусгай зөвшөөрлийг улирал бүр олгох гээд хотын ажил, амьдралтай холбоотой чухал шийдвэрүүдийг гаргасан юм.

Нийслэлийн Засаг даргын нэгдүгээр орлогч Б.Баатарзоригоор ахлуулсан ажлын хэсгийн 36 хүн таван хэсэгт хуваагдан есөн дүүрэг, есөн хороо, 11 хэлтэс, хэрэгжүүлэгч 28 агентлаг, Улаанбаатар хотын Захирагчийн Ажлын Албаны долоон хэлтсийн үйл ажиллагааг шалгасан байна. Хэлтсүүдээс Төрийн захиргааны хэлтэс, Цэргийн штаб, Санхүү, төрийн сангийн хэлтэс бүрэн хангалттай үнэлгээ авчээ. Харин нийслэлийн есөн дүүргээс “онц” гэсэн дүнг нэг ч дүүрэг авсангүй. Есүүлээ “сайн” буюу хангалттай гэж дүгнэгдлээ. Бүрэн хангалттай дүн авахын тулд дүүргүүд хоггүй болох болзлыг хангах хэрэгтэй байж. Хэрэгжүүлэгч агентлагуудаас Статистикийн газар, Архивын газар, Татварын газар, Улаанбаатар хотын Захирагчийн Ажлын Албаны харьяа газар, Ус сувгийн удирдах газар, Усны барилга, байгууламжийн газар бүрэн хангалттай дүн авсан байна. Ажил сайжруулах шаардлагатай гэсэн үнэлгээг Хөдөлмөр, нийгэм хамгааллын газар, Хүнс, хөдөө аж ахуйн газар, Халаалтын зуухны ашиглалт зохицуулалтын газар авлаа. Баянгол дүүргийн гурав, Налайх дүүргийн нэг, Чингэлтэй дүүргийн 11, Сүхбаатар дүүргийн 12 дугаар хороо бүрэн хангалттай гэж дүгнэгдлээ. 

Туул голын хамгаалалтын бүсийг тэмдэгжүүллээ

Нийслэлийн хамгаалалтын гадаад, дотоод бүсэд нийт 510 цэгт тэмдэг тавьжээ. Тэмдэгтэй газраас дотогш барилга барьж, суурьшлын бүс үүсгэж болохгүй гэсэн үг. Яг энэ хориотой бүсэд өдгөө санаатай, санамсаргүй байдлаар нийт 93 объект байрлаж байна. Үүний 18 нь ямар ч зөвшөөрөлгүй, харин зөвшөөрөлтэй гэх 75 объектын ес нь нийслэлийн Засаг даргын, 66 нь дүүгийн Засаг даргын зөвшөөрлөөр олгогдсон байх юм. Зөвшөөрөлтэй гэх нийт 75 газраас 19 нь хашаагаа хатгасан бол 22 нь барилга байгууламжаа бариад эхэлчихсэн аж. Харин 34 нь хашаагаа хатгаж амжаагүй гэнэ. Мэргэжлийн байгууллагынхан эдгээр байгууллагын төлөөлөлтэй уулзсан байна. Ямар ч байсан болохгүй газар гэдгийг сайтар ойлгуулжээ. Харин одоо хэрхэн нүүлгэх вэ гэсэн асуудал тулгараад байна. Зөвшөөрөл олгосон учир нөхөн төлбөрийг төр хариуцдаг. Зөвхөн модон болон блокон хашаа хатгасан газруудыг нүүлгэхэд 348 сая төгрөг хэрэгтэй гэнэ. Гэтэл барилга байгууламж барьсан газруудыг нүүлгэх үү, суурьшуулах уу гэдгийг шийдвэрлэхэд хэдэн тэрбумаар тоологдох мөнгө хэрэгтэй болох нь ээ. Засгийн газраас Шүүхийн шийдвэр биелүүлэх ерөнхий газрын харьяа хорихын шинэ байрыг ундны усны хамгаалалтын бүсэд байгуулахаар бараг л хүчээр шахуу шийдвэр гаргасан гэдэг. Гэтэл энэ барилгын ажлын гүйцэтгэл 80 орчим хувьтай явна. Нийт өртөг нь нэг тэрбум 600 сая төгрөг. Энэ мэтээр нарийн судалж шийдвэрлэх зарим асуудал нийслэлийн Засаг даргын зөвлөлийнхөнд нээлттэй үлдлээ. Энэхүү хамгаалалтын бүсийг тэмдэгжүүлэх ажлыг ундны усны дээд эх үүсвэр болон Биокомбинат, Шувуун фабрикын орчимд хийх шаардлага байгааг мэргэжлийн байгууллагынхан энэ үеэр хэлж байлаа. Туул гол дагуу цемент бүхий тэмдэгтийг газарт суулгасан хэсэгт барилга барих, хашаа хатгах нь өнөөдрөөс хориотой болж байна. Нийслэлийн Засаг даргын зөвлөлийн гишүүд тэмдэгжүүлэх ажлыг дэмжсэн юм.

Дүүрэг бүрт жишиг гудамж байгуулна

Нийслэлийн Барилга хот байгуулалт, төлөвлөлтийн газраас төвийн зургаан дүүрэгт нэг нэг жишиг гэр хорооллын гудамж байгуулах зураг төслийг хийгээд байна. Тухайлбал, Сонгинохайрхан дүүргийн дөрөв, Чингэлтэйн 15 дугаар зэрэг хорооноос нэгээс хоёр гудамжийг сонгон авчээ. Үлгэр жишээ гудамжийг байгуулах хөрөнгийг голчлон донор байгууллагуудын хөрөнгө оруулалтаар хийх юм байна.

Жишиг гудамж гэдэг нь нийслэлийн тухайд цоо шинээр яригдаж байгаа зүйл биш ээ. Чингэлтэй дүүргийн 11 дүгээр хорооны Нуурын 14 дүгээр гудамж нийслэлийн хэмжээнд загвар гудамж болоод байгаа юм. Тус газарт Хашаа өмчлөгчдийн холбоо хүртэл байгуулагдсан билээ.