ХЗДХЯ, Улсын Дээд шүүх, ЦЕГ, УЕП, ШШГЕГ, Төр, засгийн үйлчилгээ аж ахуй, үйлчилгээ эрхлэх газар, Гадаадын иргэн харьяатын асуудал эрхлэх газар, Иргэний бүртгэл мэдээллийн улсын төв болон Засгийн газрын хэд хэдэн байрны захиргаанд хөгжлийн бэрхшээлийн улмаас алагчлах явдлыг зогсооход чиглэсэн шаардлагатай арга хэмжээг авахыг сануулжээ. Сануулаад зогсохгүй зөвлөмжид дурдсан арга хэмжээг авч хэрэгжүүлэх талаараа 30 хоногийн дотор хариу өгөхийг шаарджээ. 

Үнэн хэрэгтээ дээрх зөвлөмжийг биелүүлэхэд хөрөнгө, хүч орохгүй гэдгийг албаны хүмүүс хэлж байна. Тэд байгууллагын барилга, байгууламжид брайль үсгээр тэмдэглэгээ хийх, нийтэд нээлттэй үйлчлэх буюу зориулагдсан бусад төрлийн обьект, үйлчилгээг хүртэх явдлыг хангах, цаашлаад тасалгааны хаалгыг босгогүй болгохыг анхааруулжээ. 

Ийнхүү сануулах болсон нь учиртай. Монгол Улс Хөгжлийн бэрхшээлтэй иргэдийн тухай олон улсын конвенцид нэгдэн орсон. Ингэснээр хөгжлийн бэрхшээлтэй иргэдийг нийгмийн амьдралд бүрэн дүүрэн оролцох боломжийг хангаж өгөх бүхий л арга хэмжээг хэрэгжүүлэх үүргийг бүх нийтийн өмнө хүлээдэг. 

Хөгжлийн бэрхшээлтэй иргэдийн хувьд хэн нэгэнд таалуулж, өөр нэгнээс халамж горьдохыг хүсдэггүй. Загас өгөх биш барих аргыг нь заагаад өгчихвөл хэнээс ч хараат бусаар амьдрахыг эрхэм болгодог. Өдгөө нийслэлд 60 мянга гаруй, улсын хэмжээнд 160 гаруй мянган хөгжлийн бэрхшээлтэй иргэн байдаг гэх албан бус мэдээ бий. Тэднээс тав хүрэхгүй хувь нь хөдөлмөр эрхэлдэг аж.