-Ямар учраас газар эзэмших, ашиглах гэрээг шинэчлэх шаардлагатай болсон юм бэ?

 -НИТХ-ын 2005 оны 4/21 тоот тогтоолоор газрын үнэлгээний бүсчлэлд өөрчлөлт орсонтой холбогдуулан нийслэлийн нутаг дэвсгэрт газар эзэмшиж, ашиглаж байгаа иргэн, аж ахуйн нэгж, байгууллагуудын гэрээг шинэчлэх шаардлагатай болсон. Энэхүү тогтоол гарсанаас хойш гэрээгээ шинэчлэх ажлыг түргэн хугацаанд явуулж дуусгахын тулд олон ажлыг зохион байгуулсан. Өнгөрсөн хугацаанд газар эзэмшиж, ашиглаж байгаа иргэн, аж ахуйн нэгж байгууллага идэвхгүй, хайнга хойрго хандсанаар энэ ажил удаашралтай байсан. Иймээс саяхан НГА-ны даргын “Газар эзэмших, ашиглах гэрээг дүгнэх, бүртгэх ажлыг сайжруулах тухай” тушаал гарсан. Энэхүү тушаалд газрын үнэлгээний бүсчлэлд өөрчлөлт орсонтой холбогдуулан газар эзэмшиж байгаа иргэн, аж ахуйн нэгж байгууллага гуравдугаар сарын 15-ны дотор газар эзэмшиж, ашиглуулах гэрээгээ шинэчлүүлж, кадастрын зураглалд бүртгүүлэхийг мэдэгдсэн. Ер нь газар эзэмших, ашиглах гэрээнд газрын төлбөрийн хэмжээнд өөрчлөлт орсон тохиолдолд гэрээг шинэчлэх гэсэн заалт байдаг.

 -Нийслэлд газар эзэмшдэг хичнээн иргэн, аж ахуйн нэгж байдаг вэ?

 -Өнөөдөр нийслэлд 11 мянга гаруй иргэн, аж ахуйн нэгж, байгууллага газар өмчилж, эзэмшиж, ашигладаг. Үүнээс 6000 гаруй нь Нийслэлийн Засаг даргын захирамжаар газар эзэмшдэг бол үлдсэн нь дүүргийн Засаг даргын захирамжаар газар эзэмшиж, ашиглаж байдаг.

 -Энэхүү тогтоол гарснаас хойш хэдэн хувь нь гэрээгээ шинэчлүүлээгүй байна вэ?

 -Нийслэлд газар эзэмшиж, ашиглаж байгаа иргэн, аж ахуйн нэгж байгууллагаас 1023 аж ахуйн нэгж байгууллага гэрээгээ шинэчлээгүй, газрын эрхийн хугацаа дууссан 1261 кадастрын зураглал хийлгээгүй /давхардсан тоогоор/ 5692 иргэн, аж ахуйн нэгж, байгууллага байна. Иймээс иргэд, аж ахуйн, нэгж байгууллага энэхүү ажилд идэвхи санаачлагатай хандаж заасан хугацаанд Нийслэл болон дүүргийн газрын албан дээр ирж гэрээгээ шинэчлүүлэхийг хүсч байна.

-Цаг хугацааны хувьд давчуу юм байна. Иргэд юуг анхаарах вэ?

 -Гэрээг шинэчлэх тухай тогтоол батлагдсанаас хойш дөрвөн жил болж байна. Энэ ажилд иргэд, аж ахуйн, нэгж байгууллага идэвхигүй, хайнга хандснаар удаашралтай байгаа учраас цагийг ч гэсэн давчуу зааж өгсөн. Нийслэлийн Засаг даргын захирамжаар газар эзэмшиж, ашиглаж байгаа иргэд, аж ахуйн, нэгж байгууллага Нийслэлийн газрын алба, дүүргийн Засаг даргын захирамжаар газар эзэмшиж, ашиглаж байгаа иргэд, аж ахуйн, нэгж байгууллага дүүргийнхээ газрын албан дээр газрынхаа бичиг баримтыг эх хувиар авч ирж гэрээгээ шинэчлэх ёстой.