Нийслэлийн Иргэдийн төлөөлөгчдийн хурлын Тэргүүлэгчдийн шинэ оны анхны хуралдаан боллоо. Хуралдаанаар хэд хэдэн чухал шийдвэрийг гаргасан юм. Хот өөрийн өмчийн чанарыг сайжруулах, бас нөгөө талаас иргэдээ орон сууцаар хангах зорилгоор Орон сууцны санхүүжилтийн корпорацийг байгуулж байлаа.

Тус корпорацийн нийслэлийн эзэмшдэг 51 хувийн зарим хэсгийг Сангийн яам авах гэж нэг хэсэгтээ л хэл ам татлаж байсан нь саяхан. Өмч давамгайлсан хувь эзэмшдэг нийслэлдээ захирагддаггүй том толгойтой хэмээх шүүмжлэлийг ч тус газар хүртэж байсан. Бүр энэ асуудал дээд шатандаа яригдаж, Орон сууцны санхүүжилтийн корпорацийн 51 хувь нь нийслэлийнх гэдгийг Засгийн газраас баталгаажуулж өгсөн юм. Орон сууцны санхүүжилтийн корпорацийн үлдсэн 49 хувийг Сангийн яам, Зам тээвэр, барилга хот байгуулалтын яам эзэмшдэг. Өөрөөр хэлбэл яг тэнцүү буюу Сангийн яам 24.5, Зам тээвэр, барилга, хот байгуулалтын яам мөн 24.5 хувийг нь эзэмшдэг гэсэн үг. Нийслэлийн Иргэдийн төлөөлөгчдийн хурлын Тэргүүлэгчдийн энэ удаагийн хурлаар нийслэлдээ үлдсэн Орон сууцны санхүүжилтийн корпорацийн Төлөөлөн удирдах зөвлөлийн бүрэлдэхүүнийг шинэчлэн тогтоов. Тус Төлөөлөн удирдах зөвлөлд нийслэлээс таван хүн байхаар боллоо. Нийслэлийн Барилга хот байгуулалт, дэд бүтцийн асуудал хариуцсан орлогч дарга Б.Мөнхбаатар, Хууль зүйн хэлтсийн дарга Түмэнбаяр, Санхүү, эдийн засаг, төрийн сангийн хэлтсийн дарга Ж.Эрдэнэбилэг, Өмчийн харилцааны газрын дарга Ч.Однасан, Газрын албаны дарга Ц.Сандуй нар Орон сууцны санхүүжилтийн корпорацийн Төлөөлөн удирдах зөвлөлийн бүрэлдэхүүнд багтаж байна. Сангийн яам, Зам тээвэр, барилга, хот байгуулалтын яамнаас тус бүр хоёр хоёр хүн энэхүү зөвлөлийн бүрэлдэхүүнд багтдаг байна.

Мөн Тэргүүлэгчид Орон сууцны санхүүжилтийн корпорацийн үйл ажиллагааны талаарх мэдээллийг ирэх дөрөвдүгээр сард сонсохоор болсон юм. Гэмт хэргээс урьдчилан сэргийлэх ажлыг зохицуулах зөвлөл, нийслэлийн Шашин сүм хийдийн асуудал эрхэлсэн ажлын хэсгийн бүрэлдэхүүнийг уг хурлаар шинэчлэн тогтоолоо.  Нийслэлийн Иргэдийн төлөөлөгчдийн хуралд МАХН, АН-ын гэсэн хоёр бүлэг байгуулагдсан. Тиймээс намын бүлгийн ажлын албыг байгуулж байгаа бөгөөд МАХН-аас гурав, АН-аас мөн гурван хүнийг ажиллуулах юм. Эхний ээлжинд хоёр намаас тус бүр нэг нэг хүнийг томилон ажиллахаар болж, МАХН-аас Д.Баяр, АН-аас Ш.Ороссүхийг томиллоо. Хоёр ч барилга байгууламжийг нийслэлийн өмчид бүртгэн авав. Багануур дүүргийн Хөдөлмөр, халамж, үйлчилгээний хэлтсийн барилга ашиглалтад орж, улсын комисс энэхүү барилгыг бүртгэн авчээ. Нийгмийн хамгаалал, хөдөлмөрийн яамнаас уг барилгыг бариулахад нийт 500 гаруй сая төгрөг зарцуулсан байна. Мөн тус дүүргийн нэг, дөрөвдүгээр хорооны нутаг дэвсгэрт баригдсан дөрвөн ус түгээх байрыг нийслэлийн өмчид бүртгэн авч, ашиглалтыг нь “Багануур ус” компанид хариуцуулахаар болов. Нийслэлийн Иргэдийн төлөөлөгчдийн хурлын Тэргүүлэгчид газрын нэгдмэл сангийн тайлан, тэнцлийн тухай мэдээллийг энэхүү хурлаараа сонсож, тэмдэглэл гаргалаа. 

Улаанбаатар Таймс