Энэ талаар ямар ажил төлөвлөж, хийх гэж байгаа талаар Улаанбаатар хотын ерөнхий дендерлогч, Байгалийн ухааны доктор Б.Чимэдээс тодруулсан юм.

-Энэ жилийн цэцэрлэгжүүлэлт тохижилтыг яг хэдийнээс эхэлж хийх гэж байна вэ?

-Энэ жил нийслэл хот байгуулагдсны 370 жилийн ой болох гэж байгаатай холбогдуулан урьд жилд хийж байсан ажлаа үргэлжлүүлнэ. Мөн ногоон байгууламж цэцэрлэгжүүлэлтийг нэмэгдүүлэх зэрэг олон зүйлийг төлөвлөсөн байгаа. Томоохон ажил нь ундны усны эх үүсвэр болох Туул голын сав дагуу цэцэрлэгт хүрээлэнг барьж байгуулах юм. Энэхүү ажлын хүрээнд зураг төсөл гаргаж багагүй хөрөнгийг төсөвлөсөн.

Түүнчлэн Гандангаас уруудсан Занабазарын нэрэмжит гудамжинд нарс мод шилжүүлэн суулгах замаар иж бүрэн гэрэлтүүлэг тавина. Дүүрэг албан байгууллагуудын эзэмшлийн газарт хоёроос доошгүй бичил тохижилт цэцэрлэгжүүлэлтийг хийнэ.

Ноднин жил яг ийм тохижилтыг Улаанбаатар хотод хориодыг хийсэн нь үр дүнтэй болсон. Зургаан сараас бид 3000 ам метр газарт цэцгийн мандал байгуулах төдийгүй хотын гудамж талбайг цэцэгжүүлэх, зүлэгжүүлэх албан байгууллагууд өөрсдийн эзэмшил газар дээр мод тарих болзолт уралдааныг зарлахаар төлөвлөсөн. Маргааш нийслэлийн Засаг даргын зөвлөлийн хурлаар энэ асуудлыг хэлэлцэнэ.

-Өнөөдөр нийслэлд яг хичнээн төрлийн мод ургуулж байна, голчлон ямар модыг тарьж ургуулах вэ?

-Улаанбаатарт нийт тавиад төрлийн мод сөөг ургадаг. Мэдээж ургуулж чаддаг модоо л тарьж ургуулна. Бид өнгөрсөн жил гацуур гэх мэт өндөр ургадаг модыг ойгоос шилжүүлэн суулгасан.

Өнгөрсөн жил Байгаль орчны яам, Улсын мэргэжлийн хяналтын газартай хамтарч модныхоо амьд байдлыг үзэж танилцахад 98-100 хувийн ургалттай байсан. Ийм өндөр хувьтай байгаа учраас энэ жил ч гэсэн мод шилжүүлэн суулгах ажилд онцгой анхаарч ажиллах болно. Нарс, Хус, Гацуур зэрэг таваас долоон метрийн өндөртэй 20-30 жилийн настай хүний гар хүрэхээргүй модыг шилжүүлэн суулгана.

-Тэгэхээр нэгийг хийх гээд нөгөөг сүйтгэж байгаа хэрэг биш үү?

-Зарим хүмүүс болохгүй энэ тэр гэж хэлдэг. Гэхдээ өндөр хөгжилтэй орон болох Солонгос улс гээд дорно дахины орнууд мод шилжүүлэн суулгах замаар хот, улсаа цэцэгжүүлж чадсан.

Манайхан жижиг мод тарьчихаад түүнийхээ араас ажиллаад ч үр дүн хүрдэггүй учраас энэ жил шинэ бодлого баримтлан ажиллах болно. Байгаль хамгаалах газар зөвшөөрч байгаа. Хамгийн гол нь зөв суулгах нь чухал.