Улсын хэмжээнд шүүхээр шийдвэрлэгдсэн гэмт хэргийн улмаас учирсан нийт хохирол 14.9 тэрбум төгрөг байна. Үүний долоон тэрбум нь залилангийн хэргээс үүдсэн аж. 2007 онд улсын хэмжээгээр залилангийн 153 хэрэгт 228 хүн шийтгүүлсэн бол 2008 онд 193 хэрэгт 304 хүн шийтгүүлжээ. Энэ нь залилангийн хэрэг 26 хувиар, ял шийтгүүлэгчид 33 хувиар өссөн үзүүлэлт ажээ.

Сүүлийн жилүүдэд олноор гарах болсон визний залилангийн хэрэг буурахгүй, харин ч өсөх хандлагатай байна. Мөн бусдын автомашиныг залилах, хөрөнгө оруулалт оруулах нэрийдлээр бусдын эд зүйлийг залилах явдал нэлээд гарч байна.

Үүнээс гадна мөнгийг нь өсгөж өгнө хэмээн хүний байрыг барьцаанд тавиулан зээл аваад зээлийн хүүгийн өрөнд оруулах, байрыг барьцаанаас чөлөөлнө хэмээн мэхлэх хэрэг олноор гарах боллоо. Зөвхөн нийслэлийн шүүхд өнгөрсөн онд орон сууцтай холбоотой залилангийн 30 шахам хэрэг шийдэгджээ. Эдгээр хэргийн хамгийн бага нь хоёр, их нь гуч шахам хохирогчтой байна.

Хохирогчид орон сууцаа банк, банк бус санхүүгийн байгууллага, хадгаламж зээлийн хоршоонд өөрсдөө барьцаанд тавьж, гэрээ хийгээд зээл авдаг. Авсан зээлээ өндөр хүүтэй өгч ашиг олох, шагнал авах сонирхолдоо хөтлөгдөж залилагч нарт алддаг учраас иргэдэд орон сууцыг нь буцааж өгөх боломжгүй тул гэрээний дагуу хураагдаж иргэд давхар хохироход хүрч байна. Иймээс бусдын арга мэхэнд автаж залилангийн хэргийн хохирогч болохгүй байхыг шүүхийн байгууллагаас анхааруулж байна.

gogo.mn