Эрдэс баялаг, эрчим хүчний дэд сайд Ч.Энхтайванаас зарим зүйлийг тодрууллаа.

-Засгийн газрын хуралдаанаар танайх ямар асуудал оруулсан бэ?

-Инфляцитай холбогдуулж үнэ тарифыг индексжүүлж, цаашдаа өсгөж буулгаж байхаар Эрчим хүчний тухай хуульд өөрчлөлт оруулахаар боллоо.

-Индексжүүлэлтийг яаж хийх вэ?

-Өргөн хэрэглээний бараа таваар импорын бараа бүтээгдэхүүн хэрхэн нэмэгдэж байгаатай харьцуулж хийнэ. Түлш эрчим хүчний салбарын гол зардал болох шатахуун түлшний үнэ яаж өөрчлөгдөж байна. Энэ бүхнээс хамаарсан тодорхой, өөрчлөлтийг индексжүүлэлтээр гаргаад, тухай бүр нь алдагдалгүй байхаар тооцоолно.

-Монгол Улсыг хөгжүүлэх сангаас гаргаж байгаа зургаан тэрбум төгрөгийг юунд зарцуулах вэ?

-Дулааны станцуудын найдвартай ажиллагааг хангахын тулд станцуудад 21 хоногийн нөөц байх ёстой. Энэ нь Улаанбаатар хотын гурав, Эрдэнэт, Дарханы станцыг оруулаад тооцохоор 21 хоногийн нөөцөө бүрдүүлэхийн тулд өнөөдрийн ханшаар 5.3 тэрбум төгрөг болж байгаа юм. Эрчим хүчний үйлдвэрүүд маань өөрсдөө алдагдалтай ажиллаж байгаа. Санхүүгийн чадвар байхгүй учраас энэ хэмжээгээр уурхайнууддаа өр үүсдэг. Энэ хэмжээгээр нүүрсээ нөөцөлж чадахгүй байна гэсэн үг.

-Дулааны цахилгаан станцууд өнөөдрийн байдлаар хичнээн хоногийн нөөцтэй байна вэ?

-Өнөөдөр төвийн дулааны станцууд үндсэндээ 5-10 хоногийн нөөцтэй байна. Энэ нь уурхайд томоохон аваар гэмтэл гарах, төмөр зам дээр мөн осол гарвал эх үүсвэрүүд нөөцгүй болох талтай юм. Үүнээс хамгаалж 21 хоногийн нөөц байж байх ёстой. Тэгэхээр энэ нөөц нь өнөөдөр хэрэглэгдэхгүй юм. Тийм учраас Монгол Улсын Онцгой байдлын ерөнхий газраар дамжуулаад эргэлтийн хөрөнгө гэж нэг удаа гаргаад 21 хоногийн нөөцийг бүрдүүлэх асуудал юм.

-Индексжүүлэх ажил хэдий хугацаанд явагдах бол?

-Эрчим хүчний тухай хуульд нэмэлт өөрчлөлт оруулж байж энэ асуудлыг шийднэ.