дулаан, цахилгааны эрчим хүчийг хослон үйлдвэрлэдэг ДЦС-2, ДЦС-3ХК, ДЦС-4ХК-д боловсруулсан дулааны эрчим хүчээр ф150-ф1200 мм-ийн голчтой 141.2 км хос дулааны төв шугам, 210 гаруй км хос хувиарлах шугамаар дамжуулан 1756.3 Гкал/ц дулааны ачаалал бүхий 4200 гаруй барилга объектыг тасралтгүй найдвартай хангадаг. 

Улаанбаатар хотын төвлөрсөн дулаан хангамжийн системийн хөгжлийг дулааны эх үүсгүүр болон хэрэглэгчийн өсөлт, хөгжилтэй холбогдуулан хэд хэдэн үе шатаар авч үздэг юм. 

    Хөгжлийн 1-р үе шат. 1959-1968 он 

    1959 онд Улаанбаатар хотыг хөгжүүлэх ерөнхий төлөвлөгөөний дагуу орон сууцны 40, 50, 120 мянгатын хорооллууд, хотын төв хэсгийн төр олон нийтийн байгууллагууд, аж үйлдвэрийн комбинатын арьс шир, ноос боловсруулах болон оёдлын үйлдвэрүүдийг 200-500 мм-ийн голчтой 21 км урт дулааны шугам сүлжээгээр дамжуулан 1-р ДЦС-аас хангаж эхэлснээр төвлөрсөн дулаан хангамжийн системийн үүсч хөгжихийн эхлэл болсон юм. 

    2-р үе шат. 1969-1983 он 

    Энэ үед орон сууцны 3, 4, 5, 6-р хороолол, хотын баруун ба баруун өмнөд үйлдвэрийн район шинээр баригдаж тэдгээрийг дулаанаар хангахын тулд 2 ба 3-р ДЦС-аас 400-800 мм-ийн голчтой 25 км урт дулааны шугам сүлжээг ашиглалтанд шинээр нэмж оруулсан. 

    3-р үе шат. 1984-1990 он 

    Энэ үед 4-р ДЦС-аас 700-1200 мм-ийн голчтой 67 км урт дулааны шугам сүлжээ, тухайлбал 9, 10, 11, 12-р магистраль шугамууд ашиглалтанд оруулсан юм. Энэ нь 100 айл, Улаанхуаран, Буянт-Ухаа зэрэг алслагдсан хорооллуудыг төвлөрсөн дулаанд холбож эхэлсэн юм. 

    4-р үе шат 1990 оноос хойш 

    Энэ үед Улаанбаатар хотын өсөн нэмэгдэж байгаа дулааны хэрэглээтэй уялдуулан томоохон шугамууд ашиглалтанд орж, дулаан хангамжийн технологи шинэчлэлийн төсөлүүд хэрэгжсэн юм. 2004 онд 3.6 тэрбум төгрөгийн өртөгтэй 6.1 км урттай, 1ф1000 мм голчтой дулааны шугам, 2005 онд Ханын материалын орон сууцны барилгуудыг төвлөрсөн дулаанд холбох дулааны 2.1 хос км урттай 2ф400 мм голчтой шугамыг ашиглалтад хүлээн авсан байна. 

    Улаанбаатар хотын нийт дулаан хангамжийн 80 гаруй хувийг төвлөрсөн дулааны хангамжийн эх үүсвэр эзэлж байгаа бөгөөд Улаанбаатар хотын дулааны ачааллын бүтэц, хэмжээг 2020 он хүртэл хөгжүүлэх төлөвлөлтийн шийдэл, эдийн засгийн тооцоонд тулгуурлан 2005, 2010, 2020 он хүртэл үе шаттайгаар тооцоход Улаанбаатар хотод өсөн нэмэгдэх дулааны хэрэглээг хангахын тулд 2010 он гэхэд шинэ эх үүсвэр болон шинээр төлөвлөж буй дулааны шугамыг тус тус барих шаардлага зайлшгүй гарч байгаа юм.