эдгээр салбарт мэргэжилтэй ажилчид дутагдаж байгаагаас гадаадаас мэргэжилтэй ажилчид олноор авахад хүрч байна. Тухайлбал,  2008 онд Монгол Улсад хөдөлмөр эрхлэх зөвшөөрөл албан ёсоор авсан гадаадын иргэний 27.6 хувь нь уул уурхайн олборлох үйлдвэрлэлд, 43,7 хувь нь барилгын салбарт ажилласан байна. Уул уурхай, барилгын салбарын мэргэжилтэй ажилчин бэлтгэх сургалтын хөтөлбөр, сургалтад ашиглаж буй техник, тоног төхөөрөмж, материал хэрэгсэл, багш нарын мэдлэг, ур чадвар өнөөгийн технологийн шаардлагаас хоцрогдсон, суралцагчдын дадлагын бааз муу, хугацаа богино, төгсөөд очих ажлын байрнаас хөндий байгаа зэрэг нь эдгээр салбарт дутагдаж байгаа мэргэжлийн ажилчдыг дотооддоо бэлтгэхэд тулгарч буй гол бэрхшээл болж байна. Иймд уул уурхай, зам, барилгын үндсэн мэргэжлийн ажилчдыг бэлтгэхэд хувийн хэвшлийг идэвхтэй оролцуулж, шаардагдаж буй мэргэжлийн ажилчдыг ажлын байранд буюу үйлдвэрлэл дээр сургаж, тухайн аж ахуйн нэгжид нь тогтвортой ажиллуулах замаар мэргэжил, ур чадвартай ажилтны хомсдлоос гарах явдал чухал болжээ. Энэ зорилгоор Нийгмийн хамгаалал, хөдөлмөрийн яамнаас уул уурхай, зам, барилгын салбарт нэвтэрч буй шинэ техник, технологийг ашиглан тэнд эрэлт хэрэгцээтэй байгаа мэргэжлийн ажилчдыг бэлтгэх, мэргэжил, ур чадварыг нь тасралтгүй хөгжүүлэх замаар ажил олгогч болон ажилчдын тогтвортой хамтын ажиллагаа, түншлэлийг төлөвшүүлэхэд чиглэсэн үйлдвэрлэл дээрх сургалтын хөтөлбөрийг Зам, тээвэр, барилга хот байгуулалтын яам, Эрдэс баялаг эрчим хүчний яамтай хамтран 2009 оны гуравдугаар сараас эхлэн хэрэгжүүлэхээр болжээ. 

Ингэснээр дотоодын ажиллах хүчнийг эрэлт, хэрэгцээтэй салбарт бэлтгэж, гадаадаас авах ажиллах хүчний тоог үе шаттайгаар бууруулах боломж бүрдэнэ гэж үзжээ. Засгийн газраас хэрэгжүүлж буй 100 мянган айлын орон сууц хөтөлбөрийн хүрээнд ЗТБХБЯ, НХХЯ, ЭБЭХЯ хамтран өнөөдрийн байдлаар манай улсад ямар ажлын байр эрэлт хэрэгцээтэй байгаа талаар судалгаа хийжээ. Үүний дагуу ЗТБХБ-ын сайд Х.Баттулга, НХХ-ны сайд Т.Ганди нар мэргэжилтэй боловсон хүчин бэлтгэх гэрээнд гарын үсэг зурав. Засгийн газраас 100 мянган айлын орон сууц хөтөлбөрийг дөрвөн жилийн хугацаанд хэрэгжүүлэхээр зарласан. Хэрэгжүүлэгч яамд мэргэжилтэй боловсон хүчин сургах сургалтын тал дээр хамтарсан тохиролцоо хийж гэрээнд гарын үсэг зурж байгаа юм. Эхний ээлжинд 4500 мэргэжилтэй ажилтан бэлтгэхээр боллоо” гэв. НХХ-ийн сайд Т.Ганди “Үндэсний ажилчдаар эрэлт хэрэгцээтэй ажлын байруудыг хангаж, сургаж, дадлагажуулах сургалт чухалт байгаа. Индүүчин, бетон арматурчин гэх мэт мэргэжилтнийг түргэн хугацаанд, ямар байдлаар бэлтгэж, эрэлт нийлүүлэлтийг тэнцүүлэх вэ гэдэг асуудал чухал” гэж хэлсэн юм. Зам, барилгын ажил нь улирлын чанартай, урин дулааны үед эрчимтэй өрнөдөг учраас тус салбарт шаардлагатай мэргэжилтнийг бэлтгэх нь чухал байгааг албаны хүмүүс онцолж байв.