Нийслэлийн Иргэдийн төлөөлөгчдийн хурлын Тэргүүлэгчдийн ээлжит хурал өчигдөр боллоо. Хурлаар хэлэлцэгдсэн асуудлуудыг уншигчдадаа хүргэж байна.

Хэрэг бүртгэгч албадан нүүлгэх газарт ажиллана

Нийслэлийн Газрын албанаас “Хашаа” нэгдсэн арга хэмжээг явуулж байгаа билээ. Замын хөдөлгөөнийг хаасан, зөвшөөрөлгүйгээр барилга барьсан, газар ашиглах, эзэмших эрхтэй мөртлөө хуулинд заасан хугацаанд барилгын ажлаа эхлүүлээгүй иргэн, байгууллага аж ахуйн нэгжийн хашааг буулгаж, зөрчлийг нь арилгуулж байна.

Яг энэ арга хэмжээтэй холбоотой нэгэн журмыг нийслэлийн Иргэдийн төлөөлөгчдийн хурлын төлөөлөгч нар энэ удаагийн хурлаараа гаргалаа. Энэ нь нийслэлийн хэмжээнд газар ашиглалттай холбогдон үүссэн зөрчлийг арилгахад баримтлах журам. Уг журам мөрдөгдсөнөөр газрын харилцаатай холбоотой зөрчил цаг алдалгүй арилж, энэ төрлийн маргаан илт буурах аж. Газрын зөрчил маргааныг арилгахын тулд эхлээд тухайн байгууллагад шаардах хуудсыг газрын албадаас өгдөг. Шаардах хуудас авсан байгууллага, аж ахуйн нэгжүүд зөрчлөө арилгана гэж бараг л байдаггүй. Харин нь барилгаа босгочихдог, нэгэнт босчихсон байгууламжийг буулгах эрх нийслэлийнхэнд байхгүй. Энэ байдлыг үгүй хийхийн тулд дээрх журмыг мөрдөхөөр болж байна. Мөн сүүлийн үед зөвшөөрөлгүй баригдсан хашааг буулгасны дараа иргэд тухайн газар дээр гэр авчраад барьчихдаг. Гэрийг нь албадан буулгахаар тийм ч, ийм ч алтан бурхан, эд хөрөнгө маань алга болчихлоо гэдэг байна.

Тиймээс журмын дагуу нийслэлийн Газрын алба, Цагдаагийн газартай хамтран гэрээ байгуулж, хэрэг бүртгэгч байцаагчийг албадан нүүлгэх газарт ажиллуулах юм байна. Журамд газрын маргаан зөрчлийг арилгахад оролцох үүрэгтэй байгууллагуудын хийх ажил, хүлээх үүргийг ч нарийн тусгаж өгчээ. Газрын харилцаатай холбоотой өөр нэг асуудал нь үйлчилгээний үнийн хэмжээг тогтоох тухай байлаа. Сүүлийн үед газар эдийн засгийн эргэлтэд орж байна. Зээлийн барьцаа болгох гэж байгаа газрыг өмнө нь барьцаанд өгсөн эсэх лавлагааг нийслэлийн Газрын албанаас өгдөг. Ийм лавлагааг 2008 оноос хойш 359 аж ахуйн нэгж авчээ. Хэрвээ лавлагааны үйлчилгээний үнэ гэж авдаг байсан бол нийслэлийн орлого нэлээд хэмжээгээр нэмэгдэх байсан байна. Хотын орлогыг нэмэгдүүлэх үүднээс энэхүү үйлчилгээний үнийг авах саналыг нийслэлийн Газрын албанаас гаргасан байна. Хотын орлого нэмэгдэх нь сайн хэдий ч үүний цаана иргэдэд хүнд тусах вий гэсэн саналыг зарим төлөөлөгч гаргалаа. Үйлчилгээний үнэ учраас энэ нь бага хэмжээтэй байх хэрэгтэй гэж тэд үзсэн учраас энэхүү асуудлыг дахин судалж дараагийн хурлаар оруулах нь зөв гэж үзсэн юм.

Нийслэлийн өмчит үйлдвэрийн газруудын асуудлыг үргэлжлүүлэн хэлэлцэнэ

Нийслэлийн Иргэдийн төлөөлөгчдийн хурлын төлөөлөгч нар нийслэлийн өмчит үйлдвэрийн зарим газрын үйл ажиллагаатай танилцжээ. Анхны томилолтоо “Автобус-3”, “Улаанбаатар зам засвар арчлалт компани”, хүүхдийн цэцэрлэгүүдэд хүнс нийлүүлдэг “Өсвөр үе-хүнс”, “Багачууд хүнс”, “Асгат” компанийн ажилтай танилцсанаар эхэлсэн байна.

“Автобус-3” компанийн тухайд хувьчлал нь хэд хэдэн удаа бүтэлгүйтэж, өдгөө найман автобустайгаар үйл ажиллагаа явуулж байгаа. Цалин, цахилгаан, дулаан, ажилчдын нийгмийн даатгалын өр нь нийт 373 сая төгрөгт хүрчээ. БНСУ-аас орж ирэх 400 ширхэг автобуснаас 60-ыг тус компанид өгч, парк шинэчлэлтийг хийхээр болжээ. Харин өр ширийн асуудлыг хэрхэн шийдэх вэ гэсэн асуудал энэ хурлаар нэлээд хөндөгдөв. Цэцэрлэгүүдийн хүнсний хангамжийг хариуцдаг дээрх байгууллагуудын тухайд сайн, муугийн аль аль нь байна. Баянзүрх дүүргийг хариуцсан “Өсвөр үе-хүнс” үйлдвэрийн газрын тухайд зөвхөн бизнесийн үйл ажиллагаа явуулдаг гэсэн гомдол Засаг даргад нь удаа дараа ирж байжээ.

Нийслэлийн Иргэдийн төлөөлөгчдийн хурлын төлөөлөгч нарын шалгалтын дүнд дээрх байгууллагуудад санхүүжилтийг нь урьдчилан өгөх хэрэгтэй гэж үзэв. Зарим дүүргийн удирдлага дээрх газруудаар бус өөрийн танил талаараа хувийн байгууллагуудаар дамжуулан цэцэрлэгийн хүүхдүүдийн хүнсийг нийлүүлдэг байна. Төлөөлөгч нар дээрх гурван газрын нийлүүлж байгаа хүнсний үнэтэй хүртэл танилцсан байна. Бизнес хийх хэмжээний тийм өндөр үнээр хүнсээ нийлүүлдэггүй юм байна хэмээн шалгалт хийсэн төлөөлөгч нар хэлж байлаа. Харин ч хүнсний нийлүүлэлтээ тухайн цэцэрлэгүүдийн саналаар бус нарийн цэс гарган нийлүүлэх хэрэгтэй байгаа аж. Ингэх нь хүүхдүүдийн хоолны чанарт сайнаар нөлөөлнө.

“Улаанбаатар зам засвар арчлалт” компанийн тухайд хийх ажил олддоггүй нь үйл ажиллагаанд нь нөлөөлөх болжээ. Нийслэлийн өмчит үйлдвэрийн газар болохоор нийслэлээс зарласан тендерт оролцох эрх байдаггүй. Дээр нь төсөвлөсөн мөнгөө бүрэн өгдөггүй гэнэ. Нийслэлийн нийт замд тэмдэг тэмдэглээ хийхэд 480 сая төгрөг хэрэгтэй байна. Өнгөрсөн жилд энэ ажилд 100 сая төгрөг өгсөн аж. Техник, тоног төхөөрөмж сайтай тус байгууллагыг бүрэн хүчээр нь ажиллуулахад төсвийг нь хангалттай өгч, хийх ажилтай байлгах нь зөв гэж шалгалт хийсэн төлөөлөгчид үзэж байсан юм. Харин тус байгууллагын тухайд мөнгө нь байсан ч ажил хийдэггүй, өнгөрсөн жил мөнгийг нь гаргаж өгөөд, замынхаа тэмдэг тэмдэглэгээг хийгээч гэхэд бороо орлоо гэх мэт шалтаг тоочсоор байгаад хийсэн юмгүй өнгөрсөн гэсэн нэхэл хатуутай Тэргүүлэгч гишүүн байлаа. 

Нийслэлийн худалдааны гудамж буюу Урт цагааны байр нийслэлийн өмчийн газар. Нэг жилд 300 гаруй сая төгрөгийн түрээсийн орлогыг нийслэлд төвлөрүүлдэг. Гэтэл гадна өнгө үзэмж нь тийм ч сайнгүй байгаа нь төлөөлөгчдийн сэтгэлд нийцсэнгүй. Өнгө төрхийг нь өөрчлөхөд 600 орчим сая төгрөг гаргах, эсвэл буулган шинээр барилга барих хэрэгтэй гэсэн саналыг тэд гаргасан. Энэ асуудлыг Тэргүүлэгчид өнөөдөр үргэлжлүүлэн хэлэлцэхээр боллоо. Энэ удаагийн хурлаар “Улаанбаатар бизнес хөгжлийн төв” байгуулах, нийслэлийн Өмч хувьчлах журам, өмч хувьчлах комиссын ажиллах журам, өмч хувьчлах комиссын бүрэлдхүүнийг өөрчлөх зэрэг асуудлыг Тэргүүлэгчид хэлэлцсэн юм.