Нийслэл хот үүсэн байгуулагдсаны 370 жилийн ойг угтаж хот, дүүрэг, байгууллага, аж ахуйн нэгж бүр төлөвлөгөө боловсруулан ажиллаж байгаа билээ. 370 жилийн түүхийг хадгалж байгаа Улаанбаатар хотын хөгжил цэцэглэлт иргэн, байгууллага, дүүрэг бүрээс хамаарах учраас ийнхүү тус бүрдээ томоохон ажлуудыг хийж байгаа аж.

Одоогийн байдлаар ихэнх дүүргүүд ажлын төлөвлөгөөгөө батлан гаргасан бөгөөд зарим дүүрэг ажлаа эхлүүлээд байна. Харин Сонгинохайрхан дүүрэг төлөвлөгөөгөө батлаагүй байгаа ба дөнгөж л ажлын хэсэг байгуулагдан ажиллаж байгаа гэнэ.

Тэгвэл бусад дүүргүүдийн ойг угтсан төлөвлөгөөг болон бүтээн байгуулалт, хөрөнгө оруулалтын ямар ажлууд хийх талаар нь тодрууллаа.

Налайх дүүргийн Засаг дарга Б.Баяндэлгэр:

Налайх “Ногоон хот” болно 

-Дүүргийн Засаг даргын үйл ажиллагааны мөрийн хөтөлбөр батлагдсан. Энэ хөтөлбөртөө нэлээд томоохон ажлуудыг тусгасан байгаа. Жил жилээр ажлаа хуваарилан хийх төлөвлөгөөтэй байна. Энэ оны хувьд 370 жилийн ой болон Засаг даргын мөрийн хөтөлбөрийн эхний жилтэй холбогдуулан хийгдэх томоохон ажлуудынхаа эхлэлийг тавина. Харин улсын, орон нутгийн хөрөнгө оруулалтын алинд нь ч тусаагүй томоохон ажлуудыг хийхээр төлөвлөсөн. Тиймээс хөрөнгийн эх үүсвэрийг олохын тулд ихээхэн санаачлагатай ажиллах хэрэгтэй байгаа. Ер нь том зорилго тавьж, түүнийхээ биелүүлэхийн төлөө бүх боломжийг хайх ёстой. Түүнээс улсын эдийн засаг тийм байна, Налайх дүүрэг түүнийг дагана гэсэн хүлээсэнд байгаад байвал ямар ч ажил хийж чадахгүй. Хамгийн эхэнд манайх энэ хагас жилдээ багтааж хоггүй, цэвэр дүүрэг болно. Энэ бол бидний хийх ёстой том ажил. Орчин эрүүл, цэвэр байвал хүмүүсийн сэтгэл санаа ч сайхан байна. Бас цэцэрлэгт хүрээлэн байгуулъя гэсэн зорилтыг тавиад байгаа. Ингэхдээ ганц, хоёр га газарт биш, 100 га талбайг хамарсан цэцэрлэгт хүрээлэн барьж байгуулна. Үүнийг 370 жилийн ойг сурталчилсан үзмэр, хөшөө дурсгал, зугаалах газар, спорт цогцолбортой байгуулна гэж төлөвлөж байгаа. Цэцэрлэгт хүрээлэнгийнхээ шавийг тавиад, газар шорооны ажлыг дүүргийнхээ хүч бололцоогоор хийнэ. Дөрвөн жил гэдэг бага хугацаа учраас энэ жилээс ажлаа шуурхай эхэлнэ. Мөн Налайх дүүргийг “Ногоон хот” болгох ажил энэ жилээс эхэлнэ. Ингэхдээ 5-10 га тутамд бичил цэцэрлэгүүдийг байгуулна. Бид бичил цэцэрлэг гэж ярьж байгаа боловч үнэндээ манай улсын хэмжээнд байхгүй том талбайтай цэцэрлэгт хүрээлэнг бид бий болгоно гэж зорьж байгаа.                      

Сүхбаатар дүүргийн Засаг дарга Г.Төмөрбаатар:

Бүтээн байгуулалтын ажил хийгдэхгүй

-370 жилийн ой угтаж хийх ажлын төлөвлөгөө батлагдсан. Энэ жилийн хувьд ногоон байгууламжиндаа нэлээд анхаарал тавьж, сэргээнэ гэж бодож байгаа. Цэвэрлэгээ, хот тохижилтын ажилд иргэд, аж ахуйн нэгж байгууллагыг татан оролцуулж, тэднийг уриалах ажлыг түлхүү хийнэ. Тэр дундаа гэр хорооллуудын тохижилтод анхаарна. Дамбадаржаагийн 15 дугаар хорооны 80 айлыг цэвэр бохир усны нэгдсэн шугамд холбох ажлыг хийнэ. Харин хямралтай энэ үед томоохон бүтээн байгуулалтын ажил хийгдэх боломжгүй гэж үзэж байгаа. 

Багануур дүүргийн Засаг даргын Тамгын газрын Үйлдвэрлэл үйлчилгээний хэлтсийн дарга Х.Батболд:

Төлөвлөснөө хэрэгжүүлж байгаа

-2010 онд манай дүүргийн 30 жилийн ой болно. Энэ ойдоо болон нийслэлийн 370 жилийн ойд зориулан олон ажлыг аж ахуйн нэгж, байгууллагуудтай хамтран хийхээр төлөвлөгөө боловсруулж батлуулсан. Нийт 30 ажил төлөвлөсөн. Аж ахуйн нэгж, байгууллагадаа хамтран ажиллах батламж гардуулсан байгаа. Энэ төлөвлөгөөний эхний ажлууд хийгдээд явж байна. 960 хүүхдийн суудалтай сургуулийн барилгын өргөтгөлийн ажил хийгдээд бараг дуусч байна. Энэ сарын сүүлээр хүлээлгэж өгнө. Мөн гэр хороолол, нийтийн эзэмшлийн гудамж талбайн гэрэлтүүлгийн ажлыг хийж, 211 ширхэгээр нэмэгдүүлсэн. Засаг даргын Тамгын газар, Мэргэжлийн хяналтын хэлтэс хамтраад “Тохижилт, соёлжилт, стандарт хангасан загвар хороо” гэсэн аян одоо явагдаж байгаа. Германы хамтын ажиллагааны нийгэмлэг, Дэлхийн банк, Боловсрол соёл, шинжлэх ухааны яамтай хамтран 640 хүүхдийн багтаамжтай хүүхдийн сургууль барих ажлыг хийхээр төлөвлөөд байна. 75 хүүхдийн цэцэрлэг барих зэрэг бүтээн байгуулалтын олон ажил төлөвлөгдсөн.

Харин тохижилтын ажил одоогоор эхлээгүй байна. Ирэх сараас долдугаар сарын нэгэн хүртэл тохижилтын ажлаа хийхээр төлөвлөсөн. Орон сууцны хорооллуудын дундах явган болон авто зам, цэцэрлэг, гэрэлтүүлэг зэргийг засч сайжруулах ажил хийгдэнэ. Гурван жилийн хугацаанд 100 мянган ширхэг мод тарьна. Энэ жил 10-15 мянган мод тарих төлөвлөгөөтэй байна. Харин сая төсвийн тодотголоор зарим ажлын хөрөнгө хасагдсан. Ер нь өөрсдийн боломжид түшиглэн төлөвлөсөн бүх ажлаа хийж, хэрэгжүүлэхийн төлөө ажиллах болно.    

Баянгол дүүргийн Засаг даргын Тамгын газрын дарга Ж.Бат-Эрдэнэ:

-Манай дүүргийн ажлын төлөвлөгөө батлагдаад эхнээсээ хийгдээд явж байна. 370 жилийн ойг угтсан төлөвлөгөөндөө олон ажлыг багтаасан байгаа. Өнгөрсөн эмэгтэйчүүдийн баяраар дүүргийн эмэгтэйчүүд уулзаад, зорилтоо тодорхойлсон. Одоо ахмадууд цуглаж ярилцана. Өнөөдөр дүүргийн ахмадуудын хоёрдугаар зөвлөгөөнийг зохион байгуулах гэж байна. Энэ зөвлөгөөнд нийт 300 ахмад оролцоно. Дүүргийн Засаг даргын мөрийн хөтөлбөрийг сурталчлан хэрэгжүүлэх болон 370 бүтээлч ажилд ахмадуудыг татан оролцуулахад чиглэгдэх юм. Бүтээн байгуулалтын ажил гэвэл дүүрэгтээ хэд хэдэн газарт бичил цэцэрлэг байгуулахаар төлөвлөсөн. Энэ ажил маань арай эхлээгүй байна. Мөн хороодын дунд өдөрлөг зохион байгуулагдана. Одоогоор хороодын дунд 370 бүтээлч ажилд оролцох, бүртгүүлэх ажил ид өрнөж байна.

Багахангай дүүргийн Засаг дарга И.Батнасан:

Хорин бүтээлч ажлаар бэлэг барина

-Энэ 2009 он бол нийслэлд төдийгүй манай дүүрэгт ихээхэн онцлогтой жил болж байна. Учир нь нийслэлийн 370 жилийн ой энэ онд тохиож байгаа бол Багахангай дүүрэг байгуулагдсаны 20 жилийн ой давхар болж байна. Эдгээр ойнуудаа бид хийж бүтээсэн зүйлтэй, хэлж ярих үгтэй, амжилтаар арвин угтахыг зорьж эхнээсээ хэрэгжих шатандаа явна. Тухайлбал ой угтаж албан байгууллага, аж ахуйн нэгж болгонд 20 бүтээлч ажил хийхийг уриалсан байгаа. Энэ ажил маань ч амжилттай хэрэгжиж зарим албан байгууллага бүтээлч ажлынхаа төлөвлөгөөг гарган эхнээсээ хэрэгжүүлж байгаа сайхан мэдээ байна. Манай дүүрэг бусад дүүргүүдээ бодвол дэд бүтэц сайн хөгжсөн ч залуу дүүрэг болохоор бүтээн байгуулалтын ажил их шаардаж байна. Үүнтэй холбогдуулан ирэх сараас эхлэн барилга, байгууламж барих ажилдаа орно. Мөн ирэх хавраас Багахангайд парк байгуулах, авто замынхаа сүлжээг өргөтгөх, үер уснаас хамгаалах даланг босгох зэрэг ажил хийхээр төлөвлөөд байна.

Баянзүрх дүүргийн Үйлдвэр үйлчилгээний хэлтсийн дарга Э.Бат-Амгалан:

-Нийслэлийн 370 жилийн ойг тохиолдуулан манай дүүргийнхэн олон ажил хийхээр төлөвлөж байгаа. Эдгээр төлөвлөсөн ажлууд эхнээсээ хэрэгжиж байна. Тухайлбал дүүргийн гэрэлтүүлгийн цогц ажлыг бид эхлүүллээ. Энэ ажил нь ирэх дөрвөн жилд Засаг даргын мөрийн хөтөлбөрт тусгагдсан томоохон ажлын нэг юм. Арслантай гүүрээс Офицеруудын ордон хүртэлх зам болон аж ахуйн нэгж байгууллагууд, хороод, цэцэрлэгийн гадна гэрэлтүүлгийн ажил эхэлчихсэн байгаа. Мөн хороодынхоо дэд бүтцийг сайжруулж авто замын засвар үйлчилгээг хийхээр төлөвлөсөн. Ногоон байгууламждаа услалтын иж бүрэн систем оруулж ирэхээр болж байгаа.

Улаанбаатар Таймс