Эдүгээ уг хийд нийслэлийн Баянгол дүүргийн 16,17 дугаар хороо, Чингэлтэй дүүргийн наймдугаар хорооны нутаг дэвсгэрт 60 га газрыг эзэмшиж байна. Өнөөдөр уг хийдэд 950 лам шавилан суудаг бөгөөд шашны бүх чиглэлээр суралцах, ёсчлон бүтээх 13 салбартай болжээ. Энэ орчимд Гандангаас гадна Их хүрээ дацан, Сувади цогцолбор, Баян Намсрай төв, Догма Лхахан сүм, Мамба дацан, Ламиран дацан, Зурхайн дацан зэрэг газрууд шашны үйл ажиллагаа эрхэлж байна.

Мөн энэ хавьд шашны үйлчилгээтэй холбоотой үзмэрч зурхайч нарын байр, шашны эд зүйлийн дэлгүүр зэрэг 28 барилга бий. Тэдгээрээс гадна “Мон хашаа” компани, мужаан болон оёдлын үйлдвэрлэл эрхэлдэг хэд хэдэн нэгж, “БОСА” үйлчилгээний төв зэрэг 14 аж ахуй, барилгын материал худалдан борлуулах цэгүүд ажиллаж байна.

Дэд бүтцийн сайдын тушаал болон Нийслэлийн засаг даргын 2003 оны XII сард гаргасан захирамжаар “Улаанбаатар хотыг 2020 он хүртэл хөгжүүлэх ерөнхий төлөвлөгөө”-г баталсан билээ. Дээрх төлөвлөгөөнд орсноор бол “Гандан хүрээ” хороолол уг хийдийн суурьшлын бүсэд, олон нийтэд зориулсан төвөөс бүрдэх 12 хэсэгт байх ажээ.

Хорооллын төвийн II, III хэсэгт Гандантэгчэнлин хийдийн цогцолбор байрлах юм байна. Хийдийн гол хаалганаас эхлэх маанийн хүрдтэй горооны замаар хашааг тойрч болох аж.

Мөн газар дор авто машины зогсоолтой цамын талбай байгуулж, хорооллыг тойрсон дөрвөн үүдтэй Майдарын зам тавихаар төлөвлөжээ. Өмнө талаас хийдийг холбох Занабазарын гудамжинд найман Богдын талбайг байгуулж, найман тахилыг чулуун сийлбэрээр хийж тавина.

Хорооллын баруун, хойд, зүүн хэсэгт дороо үйлчилгээний байгууламжтай орон сууцнууд барих юм байна. Харин Гандан хийд түүх соёлын хамгаалалттай газар тул орон сууцнууд ердөө 2-3 давхар байх гэнэ.

Нийт 117 338 ам метр талбайтай 535 барилга энд баригдах юм. Худалдаа, үйлчилгээ, бусад зориулалтаар 24 227 ам метр талбайтай барилга босгохоор төлөвлөсөн нь дотоодын сүсэгтэн мөргөлчид төдийгүй гадаадын жуулчдад зориулсан байгууламж болох ажээ.