Амьдрахын эрхэнд буруу харж уйлж зөв харан инээж байгаад хүүгээ, ханиа, аавыгаа, ах дүүгээ Солонгос руу үдсэн. Олон мянгаараа харьд очиж ажилласны хүчинд чамгүй олон өрх өнөөдөр тохиолог орон сууцанд орж даарч хөрөхийн зовлонгүй амьдарч байна.

Энэ хэрээр орон сууцны компаниуд хөрөнгөжиж хорооллууд хаяа залган сүндэрлэсэн. Тэд иргэдийн амьжиргаа сайжирахын хэрээр дахин хэдэн төгрөг илүү салгах аргаа сүвэгчилж эхлэв. Ингээд л ганц байр гэлтгүй элдэв нэмэлт үйлчилгээ санал болгов.

Хаалга, ханан дээр нь ганц нэг товчлуур илүү тавьсан ч түүнийгээ ам.доллараар хэмжиж амандаа орсон үнэ ханшаа хэлдэг болж. Ингэсээр байгаад байрны нэг м.кв 1000 ам.доллароос хол давлаа. Хуучин орон сууцаа зарж сайжруулах гэсэн хэсэг нь мөчөөгөө өгөлгүй үнээ нэмж шинэ хуучин байрны ялгаа бараг арилсан. Бүр сүүлдээ хуучин байр халаалт сайн дулаахан гэсэн шалтгаанаар шинээсээ илүү үнэтэй байх болов. Дээр нь үл хөдлөх хөрөнгө зуучлан борлуулдаг панаал сайтай нөхдүүд өөртөө унагах ашгаа бодон амандаа орсон үнийг хэлсээр байгаад орон сууцны ханшийг тэнгэрт хадааж орхисон. Ингэж байтал санхүүгийн хямрал гэгч мангаа айлчилан ирж хүсэл дээр хясал болж иргэдийн худалдан авах чадвар муудав. Одоо нөгөө санхүүгийн хямрал нь эдийн засгийн хямралаар буухиа залгаж зах зээл дээр бэлэн мөнгөний хомсдлыг үүсгэж орхилоо. Одоо хэчнээн хямдхан байр амласан ч авч чадах тэнхээтэй нь ховор. Ямар сайндаа хэдэн орон сууцны барилга бариад зарж амжаагүй байсан компаниудын мөнгөн орлого гацаж байж болох бүхий л хөнгөлөлтийг амлаж байхав. Гэсэн ч хямдарсан хямдарсан гээд байгаа урьдчилгааг нь гаргаад өгчих бэнчинтэй нь алга байна шүү дээ. Цаг сайхан байхад байрныхаа үндсэн үнийн .

50 хувийг төлөөд орон сууцандаа орно уу гэдэг байсан бол одоо 10 хувийг төлөөд үлдсэнийг нь зээлээр авч болно гээд ч нэмэргүй байгаа гэх. Статистикийн мэдээллээс харахад ганцхан монголчууд бэлэн мөнгөгүй болоод үл хөдлөх хөрөнгөний худалдаа буурсан биш аж. Дэлхийн дахинд хямрал нүүрлээд үл хөдлөх хөрөнгөний худалдаа бараг зогсонги байдалд оржээ. Манайхны жишээ авах дуртай АНУ-д гэхэд нэг хэсэгтээ орон сууцны ханш өсөөд зээлээ төлж дийлэхгүй нэг хэсэг нь байрнаасаа хөөгдөх дээрээ тулж байсан. Тэгвэл одоо ханш нь буурч эзэн нь олдвол худалч хүнд хэлсэн үнээр нь өгчих дөхөөд байгаа юм байх. Тэгвэл манайд мөн байдал иймэрхүү. Нөгөө үнэ тэнгэр хадаад байсан орон сууцны ханш өнөөдөр 20-30 саяар буурч байна. Гэвч хүссэн юм хүзүүгээр татна гэгчээр тоолоод өгчих мөнгө нь байдаггүй. Хямдарсан дээр нь авъя гэхээр арилжааны банкууд нь зээл олгохгүй. Хамгийн сонирхолтой нь зах зээл дээр бэлэн мөнгөний хомсдол үүсээд орон сууцны ханш буурч байхад барилгын материалын үнэ нэмэгдэж байгаа аж.

Хэрэв арилжааны банкууд зээл олгохгүй энэ байдлаараа удвал орон сууцны ханш дахин буурах хандлага байгаа гэдгийг мэргэжлийн хүмүүс хэлж байна. За тэгээд муугаар бодоход орон сууцны худалдаа буураад удвал барилгын ажил ч зогсонги байдалд орно. Тэгвэл нөгөө 40 мянга байснаа 100 мянга болсон орон сууцжуулах хөтөлбөр хүндхэн байдалд орж магадгүй юм. Тиймээс эрх баригчид хямралыг богино хугацаанд гэтэлгэж нийгмийн амьдралыг гольдролд нь оруулах томоохон хариуцлагатай нүүр тулаад байна.