Засгийн газрын ээлжит хуралдаан өнөөдөр хуралдана. Хуралдаанаар 12 асуудал хэлэлцэхээр төлөвлөжээ.

Зам тээвэр, Барилга хот байгуулалтын сайд Х.Баттулга энэ өдөр хамгийн олон асуудал танилцуулна. Тэрээр барилгын ажлыг эхлэх, үргэлжлүүлэх, зөвшөөрөл олгох дүрэм болон барилга байгууламжийг байнгын ашиглалтад оруулах дүрэм батлах тухай, барилгын захиалагчийн дүрэм батлах тухай, барилга байгууламжийн нэгж талбайн төсөвт өртөг, төсвийн жишиг үнэлгээ, үнийн индекс батлах, зарлах, журам батлах тухай зэрэг зургаан асуудал хуралдаанд оруулах болжээ. БСШУ-ны сайд Ё.Отгонбаяр монгол төрийн түүхийн музей байгуулах тухай асуудал танилцуулах бол Шадар сайд М.Энхболд эдийн засгийн хямралын нөлөөнөөс хүүхдийг хамгаалах бодлогын асуудлаар Зүүн өмнөд ази, Номхон далайн бүсийн орны олон улсын бага хуралд оролцсон дүнгийн талаар мэдээлэл хийх юм.