2008 оны Дэлхийн хамгийн баян хүнээр шалгарсан Уоррен Баффет АНУ-ын эдийн засгийн одоогийн байдлыг япончуудын гэнэтийн халдлагад өртсөн «Сувдан эрэг»-тэй зүйрлэжээ.

Америкийн эдийн засаг тийм муу биш ч, дэлхийн II дайны үетэй адил байна гэж Баффет ням гарагт оролцсон телевизийн ярилцлагын үеэр мэдэгдсэн байна. «Америкчууд айдас хүйдсийн тойрогт байна. Хүмүүс ямар нэг зүйлд дэмий зардал гаргах, хөрөнгө оруулалт хийх сонирхолгүй байна. Энэ нь байдлыг улам хурцатгана» гэж тэрээр нэмж хэлжээ. Баффетийн ярилцлага нь АНУ-ын Ерөнхийлөгчөөр сонгогдсон Барак Обамад чиглэж байв. Тэрээр Обамагийн эдийн засгийн зөвлөхүүдийн нэг юм.

Обама зөвлөхүүдийн ярьж байгааг сайн сонсдог. Олон хүний ярианаас оновчтой санаа гарч ирдэг гэж Баффет ярьжээ. Обамаг америкчуудад тулгарсан эдийн засгийн хүнд бэрх үеийг амжилттай даван туулна гэдэгт найдаж байгаагаа Баффет хэлжээ. Харин эдийн засгийн хямрал хэр удаан үргэлжлэх эсэхийг мэдэхгүй байгаагаа дэлхийн хамгийн баян хүний нэг мэдэгджээ.