Өмчийн харилцааны газрын мэргэжилтнүүд санаачлан нийслэлд метро байгуулах төсөл боловсруулж эхлээд байна. 

Дэлхийн хотууд хүн ам нь 1.0 сая хүрэхэд метроны асуудлыг тавьж шийдвэрлэж ирсэн түүхтэй. Энэ жишгээр манай улсын нийслэлийн хүн ам 1.0 сая хүрээд байгаа энэ үед метро байгуулах асуудлыг судлан үзэх нөхцөл бүрдэж байгаа юм. 

Улаанбаатар хотыг 2020 он хүртэл хөгжүүлэх ерөнхий төлөвлөгөөнд метро байгуулах төсөл тусгагдсан байна. Метроны барилгажилт, инженерийн шугам сүлжээний дэвсгэр зураг зэрэг нь хэдийнэ хийгджээ. 

Төсөлд тусгаснаар метро нь нийт таван чиглэлд 60.0 орчим км урт замтай байхаар төлөвлөжээ. Үүнд: 

-Зайсан- 7 буудал, 

-Улиастай- 5 шар, 

-Чингэс хаан нисэх онгоцны буудал-Цагаан хаалга, 

-Шар хад-Сансарын шатахуун түгээх станц, 

-Их тойрууд тойрог хэлбэрээр / уг замд зорчигчид чиглэлээ өөрчлөхийн тулд шилжин сууж үйлчлүүлэх юм/ зорчих нь. 

Метроны байгууламжийг хичнээн гүнд байгуулна зардал төдий хэмжээгээр нэмэгддэг. Барьж байгуулах нөхцөл нь ч хүндэрдэг. Байгууламжийн гүн нь усны болон геологийн нөхцөлөөс ихээхэн хамаардаг байна. Түүнээс газар дээрх байгууламжаас огт хамаардаггүй аж. 

Улаанбаатарын метрог гурван давхар барихаар төлөвлөжээ. 

I давхар 9.75 метрийн гүнд байрлах ба тус давхарт үйлчилгээний цогцолбор /мини зах/ ажиллана. 

II давхар 14.85 метрийн гүнд байрлах ба телефон утасны хэсэг, билет борлуулах, таслах хяналтын хэсэг ажиллана. 

III давхар 19.95 метрийн гүнд ба метроны зорчих хэсэг байрлах болно. 

Нэг чиглэлд шугам тавихад дунджаар 60.0 тэрбум төгрөг шаардагдана гэсэн урьдчилсан тооцоо гарчээ. Нэг ширхэг вагоны урт нь 19 206, өргөн нь 2.712 метр, өндөр нь 3.650 метр байх бөгөөд 40-45 хүний багтаамжтай гэжээ. 

Ийнхүү метро барьж байгуулах нь зах зээлийн эдийн засгийн өнөө үед цагаа олсон зөв бөгөөд бодит хөрөнгө оруулалт болох юм. Түүгээр ч зогсохгүй хотын агаарын бохирдлыг багасгах, замын түгжрэл, ачааллыг зохицуулах, цаг хугацаа хэмнэх зэрэг иргэдийн амьдрах ая тухтай орчин бүрдүүлэх, нийслэлд шинэ өмч бий болох зэрэг ач холбогдолтой талууд олон байгаа юм.