БЗМТөвийн захирал Г.Батсүх 2009 оны 2 сарын 17-22-ний өдрүүдэд БНСУлсын Сөүл хотод ажлын айлчлал хийгээд ирлээ. Айлчлалын  хугацаанд Сөүл хотод болж буй “Khyun hyang” барилгын үзэсгэлэн яармагыг үзэж, үзэсгэлэн яармагыг зохион байгуулагчидтай хамтран ажиллахаар боллоо. “Khyun hyang” барилгын үзэсгэлэн яармагт нийт 800 компани оролцсон. 

2009 оны 2 сарын 19-нд Монгол Солонгосын харилцааг дэмжих КОМЕКС нийгэмлэгийн тэргүүн хатагтай Лим Ён Жа, захирал Ким Ок Нам нартай уулзаж солонгосын барилгын салбарын бизнес эрхлэгчдийг Монголд бизнес эрхлэхэд дэмжлэг үзүүлэх, Барилга Экспо-2009 үзэсгэлэнд Солонгосын барилгын компаниудыг оролцуулах зэргээр хамтран ажиллах талаар уулзаж ярилцлаа. 

Монгол Солонгосын харилцааг дэмжих КОМЕКС нийгэмлэг нь Монгол улстай иргэний хамтын ажиллагаа явуулсанаар хамтын эрх ашгийг нэмэгдүүлж, нийгэм соёлын хөгжил, улсын өрсөлдөх чадварыг дээшлүүлэхэд хувь нэмэр оруулах зорилгоор засгийн газрын зөвшөөрөлтэй байгуулагдсан ашгийн бус олон нийтийн байгууллага юм. Мөн КОМЕКС нийгэмлэг нь БНСУлын иргэдийн Монгол улсад зорчих визийг олгохоор болжээ. 

2 сарын 20-нд БНСУ-ын Барилгачдын холбооны дэд ерөнхийлөгч Чон Гюн Чун, төлөвлөлтийн хэлтсийн дарга Ли Сон Жа, Удирдах зөвлөлийн дарга Ли Хьюн нартай уулзаж Солонгос, Монголын барилгын салбарын талаар харилцан ярилцаж, Монгол инженерүүдийг Солонгост мэргэжил дээшлүүлэх, Солонгосын зөвлөх инженерийг Монголд урьж ажиллуулах, барилгын лаборитори байгуулах БЗМТөвийн саналыг нааштайгаар хүлээн авлаа.  

БНСУлсын Барилгачдын холбоо нь 1985 онд байгуулагдсан, 6500 гишүүнтэй бөгөөд барилгын салбарын бүхий л зөвшөөрлийг олгодог төрийн бус байгууллага юм. Эрхлэх үйл ажиллагаа нь Солонгосын барилгын байгууллагуудын бизнесийн орчныг сайжруулах, төрийн үйлчилгээг таниулж  хүргэх, гишүүдийн эрх, ашиг сонирхлыг хамгаалах, бодлого боловсруулж, техник технологийн хөгжлийг дэмжих, олон улсын байгууллагуудтай хамтран ажиллах, олон нийтийг хамарсан үйл ажиллагаа зохиох зэрэгт чиглэгддэг юм байна. Жилд 20-с доошгүй барилга барьдаг барилгын компаниуд, жилд 10,000 м2-с багагүй эдэлбэр газрыг орон сууцны зориулалтаар ашигладаг үл хөдлөх хөрөнгийн компаниуд гишүүнээр элсэх шалгууртай байдаг аж. 

Айлчлалын сүүлийн өдрүүдэд БНСУлсын барилгын салбарт ажиллаж байгаа Монгол иргэдтэй уулзаж тэдний ажил, амьдралтай танилцаж, тэдний сонирхсон асуултанд хариуллаа.  

БНСУлсад эдийн засгийн хямрал болж байгаа ч барилгын салбарын үйл ажиллагаа нь хэвийн явагдаж байгаа бөгөөд Солонгос барилгачид дэлхийн зах зээлд гарч Дэлхийн хамгийн өндөр барилга Бурж Дубайн барилгыг барьж байгаагаараа бахархаж байлаа.

Үзэсгэлэн яармагийн үеэр

Монгол-Солонгосын харилцааг дэмжих КОМЕКС нийгэмлэгийн тэргүүн,

хатагтай Лим Ён Жагийн хамт

БНСУ-ын Барилгачдын холбооны дэд ерөнхийлөгч Чон Гюн Чун, төлөвлөлтийн хэлтсийн

дарга Ли Сон Жа, Удирдах зөвлөлийн дарга Ли Хьюн нартай уулзалт хийж байгаа нь

БНСУ-ын Барилгачдын холбооны дэд ерөнхийлөгч Чон Гюн Чун, төлөвлөлтийн хэлтсийн

дарга Ли Сон Жа, Удирдах зөвлөлийн дарга Ли Хьюн нартай уулсаны дараа

Barilga.mn