Энд хамгийн түрүүнд өдгөө албан ёсны нэр өгөөгүй байгаа ч Есөн хөлт цагаан туг, төрийн сүлдийг хэдийнэ залаад байгаа Чингэс хааны цогцолборыг агуулсан шинэ байранд төрийн золголт болох юм байна. 

Шинийн нэгний өглөөний золголтоос өмнө битүүний үдэд Монгол улс байгуулагдсаны 800 жилийн ойд зориулан бүтээсэн Монголын нууц товчоо, Төрийн их хан хуурыг Төрийн хүндэтгэлийн шинэ өргөөнд залж, байрлуулах ёслол болох юм байна. Энд шинэ зүйл нь 18 жилийн турш төрийн ордонд залсан Төрийн их хан хуурын дуу суларсан тул Монгол улсын соёлын гавьяат зүтгэлтэн Төрийн их хан хуурч Ц.Цэрэндорж гуайн удирдлагаар урласан шинэ хуурыг залах юм. Шинэ хуурыг эдэлгээ сайтай “шувууны нүд” хэмээх модоор урлажээ. Шинэ хуурыг одоогийн төрийн их хан хуурын загвараар хийжээ. Түүнчлэн шинэ хууранд олон шинэчлэлийг хийсэн байна. Хан хуурыг алт, мөнгөөр сүлд урлан чимэглэжээ. Мөн ишинд нь эрднийн зүйлсээр бөөлжиж байгаа ам цагаан хулганыг сийлсэн байна. Төрийн их хан хуурыг оюу эрдэнийн шигтгээгээр эхэлж номин эрдэнээр жаргаан дунд нь есөн эрдэнийг багтаажээ.  

Ер нь төрийн хан хуурыг Ардын зураач Ү.Ядамсүрэнгийн “Өвгөн хуурч” зургаас сэдэвлэсэн бөгөөд хуурын толгой нь газар дэлхийн бэлгэдэл ногоон өнгөтэй юм. Түүнчлэн цагаан сард зориулсан үндэсний бөхийн барилдаанд анх удаа төрийн их найрал хөгжим тоглох ажээ. Улмаар Шинийн нэгний төрийн ёслол уламжлал ёсоор Монгол улсын Ерөнхийлөгч Н.Энхбаяр, УИХ-ын дарга Д.Дэмбэрэл, Ерөнхий сайд С.Баяр нар Гандантэгчинлэн хийдэд очиж Мэгжид Жанрайсаг, Очирдарь бурханд хүндэтгэл үзүүлснээр эхлэх юм. 

Ерөнхийлөгч болон тэргүүн хатагтай, УИХ-ын дарга, Ерөнхий сайд нар өнөө жилийн цагаан сараар уламжлал ёсоор үндэсний хувцастайгаа золгоно гэж ёслолын албаныхан ярьж байлаа. Энэ удаагийн цагаан сарын өөр нэг онцлог нь эдийн засгийн хямралаас үүдэн Засгийн газар төсвөөс мөнгө гаргахгүй гэсэн учир төрийн золголт цагаалгагүй болох гэнэ.