Дэлхийн түүхийн явцад ямар нэг байдлаар нөлөө үзүүлсэн үйл явдал олон улсын тавцанд энэ жилтэй залгах бүрт болсон юм.

1901 он: Панамын сувгийн ирээдүйн статусын тухай АНУ, Их Британийн гэрээнд 11 дүгээр сарын 18-нд Вашингтон хотод гарын үсэг зурсан байна. Дэлхийн хамгийн нэр хүндтэй шагнал болсон Нобелийн шагналыг Стокгольм, Осло хотноо 12 дугаар сарын 10-нд анх удаа гардуулжээ.

1913 он: Балканы хойгийн анхны дайныг эцэс болгосон Болгар, Туркийн найрамдлын гэрээнд тавдугаар сарын 30-нд Лондон хотноо гарын үсэг зурж, харин нэг сарын дараа Болгарын арми Серб, Грекийн байрлалд халдсанаар Балканы хойгийн хоёрдугаар дайн эхэлсэн байна. Мөн энэ жил Америкийн “Форд мотор” компани дамжлагын угсралтын арга нэвтрүүлжээ. Олон улсын олимпийн хороо “Хамгийн хурдан, хамгийн өндөр, хамгийн хүчтэй” гэсэн олимпийн уриаг баталсан байна.

1925 он: Дэлхийн киноны алтан санд орсон Сергей Эйзенштейний “Хуягт Потемкин” киног 12 дугаар сарын 25-нд Москвад анх удаа гаргажээ. Төвийн гүйцэтгэх хорооны тэргүүлэгчид, Ардын комиссаруудын зөвлөлийн тогтоолоор Зөвлөлт Холбоот Улсын Цахилгаан мэдээний агентлагийг /ТАСС/ долдугаар сарын 10-нд байгуулсан байна.

1937 он: Иван Папанины удирдсан Зөвлөлтийн «Северный полюс» гэдэг эрдэм шинжилгээний анхны хөвөгч станц тавдугаар саргын 25-нд үйл ажиллагаагаа явуулж эхэлжээ.

1949 он: Дэлхийн газрын зурагт шинэ улсууд, тухайлбал ХБНГУ /тавдугаар сарын 27/, БНАГУ /10 дугаар сарын 7/ бий болж, харин 10 дугаар сарын 1-нд БНХАУ-ыг тунхагласан байна. Эдийн засгийн харилцан туслах зөвлөл /нэгдүгээр сарын 5-8/, НАТО /дөрөвдүгээр сарын 4/, Европын зөвлөл /тавдугаар сарын 5/ зэрэг олон улсын томхон байгууллагууд байгуулагджээ.

1961 он: Дөрөвдүгээр сарын 12-нд Зөвлөлтийн сансрын нисэгч Юрий Гагарин хүн төрөлхтөний түүхэнд анх удаа сансарт ниссэн юм. БНАГУ-д Берлиний ханыг барих ажил наймдугаар сарын 13-нд эхэлж, энэ хана бараг 30 жил нийт Европын хуваагдмал байдлын бэлгэдэл болж байсан билээ.

1973 он: Европын Аюулгүй байдал, хамтын ажиллагааны зөвлөлгөөн долдугаар сарын 3-нд Хельсинки хотод ажлаа эхэлжээ. Гуравдугаар сарын 16-нд Парис хотноо Европын тэргүүлэх орнуудын Сангийн сайд нар өөрсдийн орнуудын валютын ханшийг зах зээлийн хуульд нийцүүлэх /хөвөгч ханш/ тухай шийдвэр гаргаж, Бреттон-Вудын санхүүгийн систем үйл ажиллагаагаа зогсоосон юм.

1985 он: Гуравдугаар сарын 11-нд М.С. Горбачевыг ЗХУКН-ын ТХ-ны ерөнхий нарийн бичгийн даргаар сонгож, ЗСБНХУ-д “өөрчлөн байгуулалтын” эрин эхэлсэн билээ. Визгүй зорчих гормыг эхлүүлсэн хэлэлцээрт /Шенгений хэлэлцээр/ Европын долоон орон долдугаар сарын 14-нд Люксембургийн Шенген хотхонд гарын үсэг зуржээ. Одоо Шенгений бүсэд 25 улс багтдаг юм.

1997 он: Зургадугаар сарын 30-нд Азийн санхүүгийн хямрал эхэлжээ.