дэлхийн онлайн газрын зураг болох “Google Earth” программаа шинэчилж, дэлхийн гуравны хоёрыг программдаа бүрэн багтааснаас гадна далайн ёроолын амьдрал, мөсөн гол болон зарим нэгэн газарзүйн онцлог, өвөрмөц зүйлсийн харагдацыг сайжруулсан байна.

“Google Earth”-ийн шинэ, сайжруулсан хувилбарыг өнгөрсөн даваа гаригт Сан Франциско хотноо танилцуулсан бөгөөд уг арга хэмжээнд АНУ-ын дэд Ерөнхийлөгч асан Альберт Гор оролцсон байна. “Google Earth” программыг дэлхийн дулаарал зэрэг байгаль орчны чухал асуудалд дэлхийн хүн ард илүү ухамсартай хандах явдалд хүчирхэг нөлөө үзүүлж байна хэмээн дээрх арга хэмжээний үеэр шинжээчид дүгнэжээ. Үндэсний газарзүйн нийгэмлэгийн оролцоотойгоор далай, тэнгисийн загас болон бусад ургамал, амьтны гэрэл зураг, видео бичлэгийг ашигласан “Google Ocean”-ы хэрэглэгчид далайн давалгаа доогуур шумбаж, далайн ёроолын сонирхолтой амьдралтай танилцах боломжтой болжээ.“Google Earth” болон “Google Maps”-ыг хариуцсан захирал Жон Хэнкийн хэлснээр “Google Ocean” нь ашиг орлого олохоос илүүтэйгээр компанийн тэргүүлэгч байр суурийг бататгах тал дээр илүү анхаарч ажиллах гэнэ. “Google Earth” программаас ашиг олох асуудал дараагийн ээлжинд яригдах учиртай аж. Интернэт хайлтын системд тэргүүлэгч “Google” хувьцаат компани өнгөрсөн долоо хоногт мэдэгдэл хийж, 2008 оны дөрөвдүгээр улирлын борлуулалт 18 хувиар өсч, 5.7 тэрбум ам.долларт хүрсэн тухай мэдэгдсэн юм. Хэдийгээр дэлхийн санхүүгийн зах зээл хямралд орж, эдийн засгийн байдал доройтсон ч “Google” компани ашигтай ажиллаж байна.

“Google Ocean” программыг бүтээх явцад тус компани далай тэнгисийн гүн дэх нууцлаг амьдралын байр зүйг нарийвчлан тогтоож, визуаль орчинг бүрдүүлэх тал дээр АНУ-ын тэнгисийн цэргийн флот, үндэсний далай тэнгис, агаар мандал судлах холбоо болон бусад холбогдох байгууллагуудтай хамтран ажиллаж, багагүй хэмжээний мэдээлэл авсан байна. Даваа гаригт болсон арга хэмжээний үеэр Калифорни мужийн Маунтин-Вьюд төвтэй “Google” компани хиймэл дагуулын дэлхий рүү илгээсэн гэрэл зураг болон Mars Rovers-ээс авсан зургийн тусламжтайгаар Ангараг гаригийн гурван хэмжээст газрын зургийг бүтээснээ танилцуулжээ. 2008 онд “Google” компани судалгаа, шинжилгээний ажилд 2.8 тэрбум ам.доллар зарцуулсан нь компанийн нийт орлогын 12.8 хувь нь юм. Даваа гаригт Nasdaq-ийн бирж хаах мөчид “Google” компанийн хувьцааны үнэ 340.57 ам.доллараар зарагдсан байна.