Нийслэлийн мэргэжлийн хяналтын газар, дүүргүүд дэх мэргэжлийн хяналтын хэлтсүүдийн 2008 оны үйл ажиллагааны төлөвлөгөөнд тусгагдсаны дагуу “Нийгмийн даатгалын тухай” багц хууль, “Хөдөлмөрийн тухай” , “Эрүүл мэндийн даатгалын” тухай, “Хөдөлмөр эрхлэлтийг дэмжих” тухай хуулиуд болон тэдгээртэй нийцүүлэн гаргасан бусад хууль эрх зүйн акт, стандартын хэрэгжилтийг шалгаж буй талаар НМХГ-ын Хөдөлмөрийн ахлах байцаагч Л.Ургамалаас тодрууллаа.

 -Шалгалт хэзээнээс эхэлсэн бэ, зорилго нь юу байв?

-Барилга, барилгын материалын үйлдвэрлэлийн чиглэлээр үйл ажиллагаа явуулж буй аж ахуй нэгж байгууллагуудад “Хөдөлмөр хамгааллын гэрээ”-нээс эхлээд ажил олгогч эзэн, ажилтны хооронд хийгдэх ёстой хөдөлмөрийн гэрээний биелэлтийг хангуулах, илэрсэн зөрчил дутагдлыг арилгуулахаар зургадугаар сарын 10-наас энэ сарын 25-ны өдрийг хүртэлх хугацаанд хяналт шалгалт хийж байна.

-Шалгалтын хугацаанд илэрсэн зөрчил дутагдлууд юу байв?

-Ажил олгогч, ажилтны харилцаа буюу хөдөлмөрийн харилцааны гэрээ хийгдсэн эсэх, түүний эрх зүйн орчны баталгаажилт, хамтын гэрээний биелэлт, хөдөлмөрийн норм, үндсэн цалингийн хэмжээ, сул зогсолтын болон бусад нөхөн олговрууд олгогдож буй эсэх тал дээр түлхүү анхаарсан. Үүнтэй холбоотой зөрчлүүд албан байгууллагуудад илэрсэн.

-Сүүлийн үед барилгаас унах, амь насаа алдах зэрэг хөдөлмөрлөж байх хугацаандаа осолдох тохиолдол ихсэх хандлагатай байна. Шалгалтын хугацаанд энэ чиглэлээр ямар арга хэмжээ авсан бэ?

-Хөдөлмөрийн аюулгүй ажиллагааны чиглэлээр үйлдвэрийн машин, механизм, тоног төхөөрөмжийн аюулгүй ажиллагааны байдал, тэдгээрийг холбогдох мэргэжлийн байгууллагаар хянуулж, гэрчилгээ авсан эсэх болон ажил олгогч нь хөдөлмөрийн аюулгүй ажиллагаа, эрүүл ахуйн асуудлыг зохих тушаалын дагуу ажиллуулж байгаа эсэх зэрэгт хяналт тавьсан. Хөдөлмөрийн гэрээ огт хийдэггүй албан байгууллагууд ч байна. Шинээр баригдаж буй барилгуудын ажлыг гүйцэтгэгч компаниуд шалгалтанд хамрагдсан ч энэ талаар шалгалтын дүнг УМХГ-т танилцуулах хүртэл тухайн байгууллагын нэрийг дурдах боломжгүй.

-Шалгалтын дүн энэ сарын 30-ны дотор гарах бөгөөд нэгдсэн дүнг тухайн байгууллагад танилцуулж, илэрсэн дутагдал зөрчлийг арилгуулах арга хэмжээ авахын сацуу эргэж хянах шаардлагатай гэсэн байгууллагын талаар дотоод зөвлөлийн хуралд оруулж асуудлыг нь шийдвэрлэхээр ажиллаж байна.