Азийн хөгжлийн банк, БНСУ-ын Засгийн газрын хөнгөлөлттэй зээлээр хэрэгжиж буй Бүс нутгийн автозам хөгжүүлэх төслийн хүрээнд Чойр-Сайншанд-Замын-Үүд чиглэлийн 432 км хатуу хучилттай замын барилгын ажлын нээлтийн ёслол Сайншанд хотын ойролцоохь авто зам дээр боллоо. Ёслолын ажиллагаанд Ерөнхий сайд М.Энхболд, Зам тээвэр, аялал жуулчлалын сайд Ц.Цэнгэл болон албаны хүмүүс оролцсон. Замын эхний хэсэг болох Чойр-Төмөр замын 35 дугаар зөрлөгийн 176.4 км автозамыг БНСУ-ын хөнгөлөлттэй зээлээр тус улсын компани гүйцэтгэх юм. Хоёр дахь хэсэг болох 35 дугаар зөрлөг 18-ын худаг чиглэлийн 131.3 км авто замын ажлыг Азийн хөгжлийн банкнаас санхүүжүүлж, БНХАУ-ын компани гүйцэтгэх юм байна. Төслийн барилгын ажлын хяналтын зөвлөхөөр Энэтхэг улсын “Ай-Си-Ти Консалтинг” компани ажиллах аж. Зам барилгын ажлыг 2008 оны 11 дүгээр сард дуусгахаар төлөвлөж байна. Монгол Улсын босоо тэнхлэгийн гол зам болох энэхүү 432 км авто замыг тавьснаар манай улс олон улсын автозамын сүлжээний АН-3 чиглэлд холбогдох юм байна.