Фэн Шуй гэдэг нь “Ус-Салхи” гэсэн үг бөгөөд энергийн төрлүүд ба тэдгээрийн урсах замыг тодорхойлдог юм. Энэ ухаан олон мянган жилийн тэртээ анх Энэтхэгт үүсч, улмаар Хятад, Япон, Солонгос, Хонг-Конг, Тайвань, Малайз, Сингапур зэрэг улсад хожмоо дэлгэрэн тархжээ. Эдгээр орны ард түмэн, ялангуяа худалдаа арилжаа эрхэлдэг байгууллага, компани үйл ажиллагаагаа өргөжүүлэх, амжилтанд хүрэхэд Фэн Шуйг хамгийн хүчтэй хэрэгслээ болгосоор ирсэн байна. Фэн Шуйгийн олон сургуулиуд байдаг боловч бүгд л Инь Ян, 5 махбодь, дөрвөн зүг найман зовхистой холбоотой онолын үндэс заадаг. Харин гагцхүү дадлагажих арга зам нь өөр юм. Луужингийн арга  нь зүг бүрт өөр өөр төрлийн энерги оршдог луужингийн найман зүг дээр үндэслэсэн арга юм. Өөрөөр хэлбэл ажлын байр, орон гэрт тань орших энергийн төрлүүд болон тэдгээрийн давуу, сайн талуудыг хэрхэн олж авах, ашиглах аргыг заадаг. Мөн Есөн Ки зурхайгаар өөрчлөлт хийхэд тохиромжтой цаг хугацааг тодорхойлдог юм.

Фэн Шуй бол бизнес гэсэн үг
Бизнесийн ертөнц улам бүр даяарчлагдан хөгжиж буй өнөө үед ажил хэрэг, үйлдвэрлэлийн бүтээн байгуулалтаа бусад соёл иргэншилтэй хослуулан дээшлүүлэх шинэ сайхан боломжууд бидний өмнө нээгдээд байна. Үүний жишгээр баруун Европын орны ихэнх пүүс, компаниуд алс Дорноос үүсэлтэй азийн орны бизнесийн амжилтын нууцыг тандан судалж, ажил үйлстээ ашигласнаар бизнесийн амжилтаа дуудаж, ирээдүйгээ бататгах болжээ.

Шинэ бизнес эхлэх, бизнесийн үйл ажиллагаагаа өргөжүүлэх, хүндрэлтэй асуудлыг шийдэх зэрэг амьдралд тохиолдох аливаа үйлийг зохицуулахад алс Дорнын улс түмэн Фэн Шуйг өргөн дэлгэр ашигладаг билээ. Үүнийг мэдэрсэн европчууд нийт олноороо Фэн Шуйг ашиглан ажил хэргээ урагштай эрхлэх болжээ. Гэртээ жижиг үйлдвэрлэл явуулдаг ажилчдаас эхлээд томоохон бизнес эрхэлдэг бизнесменүүд хүртэл, мөн жижиг компаниас олон улсын том корпораци хүртэл бүх л шатны бизнест Фэн Шуйгийн ашиг тусыг адил тэгш хүртэж болдог билээ.
Фэн Шуйгийн гол үндэс нь хүмүүс ба хүрээлэн буй орчны харилцаа юм. Физикийн хуулийн нэгэн адил хүрээлэн буй орчин дахь энгийн л нэг зүйл бидний дотоод зорилго, хөгжил хөдөлгөөн, биеийн болон сэтгэл зүйн эрүүл мэндэд нөлөөлж байдаг. Фэн Шуй нь Дорнын анагаах ухаан, зурхай, гүн ухаан зэрэг шинжлэх ухааны салбаруудын ертөнцийг үзэх нэгдмэл, цогц үзэл юм. Энергийн урсгал ертөнц даяар урсгал хөдөлгөөнд байж, орон зай, цаг хугацаатай нэг солбицолд оршин, бидний амьдралын хэв шинж, нөхцөл байдлыг тодорхойлж байдгийг чухамхүү Фэн Шуйгийн ухаан гол баримтлалаа болгодог билээ. Энэхүү нөлөөлөл нь бидний санаа зорилго, хүсэл эрмэлзэлтэй зохицон эсвэл үйлийг дэмжиж, нэг бөгөөс харшилдан зөрж байдаг аж. Фэн Шуй нь бодит орон зайд буюу бидний ажиллаж, амьдарч буй орчинд нөлөөгөө үзүүлдэг. Өөрөөр хэлбэл, Фэн Шуй нь бидний идэвхтэй оршин байдаг орон зайн нөлөөллийг тайлбарлах, ингэснээр таатай орчин нөхцлийг бид өөрсдөдөө бий болгох мэдлэгийг өгдөг юм. Тиймээс эрхэм та Фэн Шуйгийн ухааныг танин мэдэж, суралцсанаараа гэр бүлийн аз жаргал, ажил үйлсийн амжилт бүтээлээ цогцлоон бүрдүүлэх боломжтой болох билээ.

Фэн Шуйгийн зорилго
Ямарваа худалдаа, арилжаа эрхэлдэг байгууллагын барилга байгууламж нь тухайн чиглэлийн бизнест урт болон богино хугацааны ивээлтэй, сайн нөлөө үзүүлж байх ёстой билээ. Фэн Шуйгийн ухаанаар бол өнгөн талын үзэмжийг анхаарч барилга байгууламжаа тохижуулах бус харин энергийн зөв зохистой урсгалыг бий болгоход голлон анхаарч дотоод дизайныг шийдэх нь бизнесийг амжилтад хүргэх хүчтэй нөлөөлөл үзүүлдэг. Харин бид үүнийг хоёрдугаар нөхцөл болгон ойлгодог. Аливаа “Хаалттай” ажлын байр, тухайлбал, албан байгууллага, үйлдвэрийн газрууд нь ажилчдаа үр бүтээлтэй, идэвхитэй ажиллах нөхцлийг бүрэн хангаж, хорт нөлөөлөлд өртөж, сэтгэл санааны дарамт, тавгүй байдалд оруулахааргүйгээр тохижолтоо зохицуулсан байх ёстой. Харин “нээлттэй” ажлын байр буюу дэлгүүр хоршоо, ресторан, цэнгээний газрууд нь үйлчлүүлэгч, худалдан авагчдыг урин дуудсан, анхаарлыг нь татсан байх ёстой. Ингэснээрээ худалдааны салбарын өрсөлдөөнд дийлэхүйц давуу талыг бий болгодог.

Харин худалдааны бус салбарт аль болох бага зарлагатай ажиллах, элдэв бэрхшээлийг шийдэхэд Фэн Шуйг ашиглаж болно. Энэ салбарынхан ихэвчлэн дээрх зорилгын үүднээс Фэн Шуйгийн зөвлөгөөг авдаг. Хамгийн гол нь, ажил бизнес тань үр өгөөжтэй байж, өсч хөгжих нь л чухал шүү дээ. Фэн Шуйгээр энергийн урсгалаа зохицуулж, үр шимийг нь хүртэж буй албан газрын ажилчдын ажлын амжилт давхар  дээшилж байдаг. Ер нь анзаараад байхад ихэнх байгууллагууд Фэн Шуйг зөвхөн удирдлагын салбартаа л ашигладаг. Гэтэл зарим тохиолдолд энэ нь үр дүнд хүрдэггүй. Тиймээс нийт ажилчин тус бүрийнхээ Фэн Шуйг сайжруулснаар эерэг үр дүн илтэд харагдах болно.

Фэн Шуйг амьдралд хэрэгжүүлснээр үзүүлэх нөлөө

Ажилчдад:
•    Таатай, эрүүл орчинг бүрдүүлнэ.
•    Ажлын байраа зөв зохистой зохион байгуулна.
•    Сэтгэл санааны хямралд өртөхгүй.
•    Өөрийгөө хянах чадвар сайжирна.
•    Өөртөө итгэх итгэл нэмэгдэнэ.
•    Өөрийн гэсэн том зорилготой болно.
•    Бүтээлч чанараа дээшлүүлнэ.
•    Ажил, мэргэжилдээ сэтгэлээсээ хандан ажиллах болно.
•    Хамт ажиллагсадтайгаа эв найртай байж, гар нийлэн ажиллах болно.
•    Та улам бүр сайшаал, үнэлэмж сонсох болно.
•    Амжилт, урамшуулал өснө.
•    Албан тушаал дэвшинэ.

Дарга, менежерүүдэд:
•    Ажилдаа идэвхи сонирхолтой, удирдлага доорх хүмүүстэй сайн харилцаатай байж, зохион байгуулах авьяас сайжирна.
•    Хамт олон дотроо эв найртай уур амьсгал үүсгэнэ.
•    Өөрчлөн шинэчлэгч, бүтээлч чанар нэмэгдэнэ.
•    Цөөн боловч оновчтой боловсон хүчинтэй болно.
•    Ажил таслалт багасна.
•    Санал зөрөлдөөн багасч, ажиллах чадвар нэмэгдэнэ.
•    Байшин барилга, орон зай, тоног төхөөрөмжийг бүрэн, үр дүнтэй ашиглана.
•    Олон нийтийн харилцаа сайжирна.
•    Үнэнч харилцагчидтай болно.
•    Бүтээгдэхүүний борлуулалт нэмэгдэнэ.
•    Ашиг орлого сайжирна.

Зорилго ба бодлого
Учирч  буй хүндрэл бэрхшээл ба түүний хор уршгийн хэмжээнээс хамаарч барилгын дотоод хэсгийг бүрэн өөрчлөх, дахин засварлах, өнгөний зөв хослолыг сонгох, тавилга ширээгээ өөрчлөн засах, зарим төрлийн цэцэг ургамал байрлуулах зэрэг Фэн Шуйгийн заслуудаас хэрэглэдэг. Ийм багахан өөрчлөлт амжилтад хүрэхэд маш чухал нөлөө үзүүлж чаддаг билээ.
Фэн Шуйгийн зарчмуудыг амьдралд нэвтрүүлэхээсээ өмнө түүний зөвлөмжүүдийг авч өөрийн зорилгоо тодорхойлох хэрэгтэй байдаг. Хамгийн гол нь та юунд хүрч, юуг өөрчлөхийг хүсч, ямар үр дүн хүлээж байгаагаа тодорхойлох нь чухал юм. Жишээ нь, хэрвээ таны бизнест өрсөлдөгч их байгаа бол, ашиг орлого хангалттай орж ирэхгүй байгаа бол анхдагч учир шалтгааныг нь олохыг хичээ. Үүний тулд чанар муу бараа худалдаалж байгаа эсэх, худалдааны зохион байгуулалт муу, барааны хангамж хангалтгүй байгаа, санхүүгийн сул менежмент явуулж байгаа зэрэг бүхий л талаар гаргаж буй алдаагаа олж тогтоох хэрэгтэй. Дараа нь юуг, хэрхэн өөрчилж засахаа шийд. Тухайлбал, дадлага туршлагаа сайжруулах, шинэ техник, технологи нэвтрүүлэх, харилцаа холбоогоо сайжруулах зэрэг арга хэмжээ авч болно шүү дээ. Эдгээр асуултыг тодруулсны эцэст Фэн Шуйгийн чухам ямар засал хэрэглэхийг шийдэх юм. Би аливаа асуудлаа шийдэхдээ аль болох сайн үр дүнд хүргэх Фэн Шуйгийн аргыг хэрэглэдэг. Үүний тулд хүндрэлтэй асуудлаа нарийн тодорхойлж, илүү үр нөлөөтэй байх шийдэл хайдаг. Харин бусад онцын шаардлагагүй зүйлс дээр эргэлзэлгүй, тулгараад буй гол асуудалдаа анхаарлаа шууд хандуулдаг юм. Та өөртөө даалгавар өгч, тодорхой хугацааны дотор түүнийгээ биелүүлэхийг хичээ. Дараа нь, хоёрдахь алхмаа хийгээрэй. Нэг доор хэтэрхий олон өөрчлөлтийг хийх гэж хүчилбэл чухам аль өөрчлөлт нь танд сайнаар нөлөөлж буйг ялган танихад хэцүү болно.  Зарим тохиолдолд Фэн Шуйгийн заслуудын үр дүн тэр дороо мэдрэгдэхгүй, ямар нэг өөрчлөлт харагдтал хэдэн сар ч шаардагдаж болно. Хамгийн гол нь та түүний үр дүнг итгэн хүлээх хэрэгтэй. Мөн Есөн Ки зурхайгаар та өөрийгөө ямар үелэлд оршин буйгаа мэдэж болно.

Фэн Шуйгийн үйлчлэл
Фэн Шуй ямар нэг хэмжээгээр заавал үйлчлэл үзүүлдэг. Фэн Шуйгийн заслыг компани, байгууллага дээрээ хэзээ ч хэрэглэж болох боловч, хамт олноороо зөвлөлдөж байгаад хамгийн чухал үеийг сонгох нь чухал. Тухайлбал:
•    Шинэ бизнес эхэлж буй үед
•    Байшин барилга, орон сууц барьж буй үед
•    Ажлын байраа шинэчлэх үед
•    Өөр нөхцөл байдалд ажиллах үед
•    Хямрал тохиолдсон буюу яаралтай шийдэх асуудал тулгарсан үед
•    Ирээдүйн төлөвлөгөөгөө зохиож буй үед
•    Шинэ боломж нээхийг хүссэн үедээ  Фэн Шуйгийн заслыг хийдэг.

“Чи” энерги
Харах, хүртэх, амтлах, сонсох, үнэртэхээс гадна зургаа дахь мэдрэхүй болох байгалийн нэгэн хүч байдаг гэж эртний Дорно дахинд үздэг байжээ. Хятадад энэ энергийг “Чи”, Японд “Ки”, Энэтхэгт “Прана” гэж нэрлэдэг. Хүний бие махбодид орших энэхүү “Чи” энерги нь бодол санаа, хүсэл мөрөөдөл, мэдрэмжийг төрүүлж байдаг. Бидний биеэр цус тархдагтай адил энерги нь эд эс бүхэнд аажим аажмаар тархдаг. Өөрөөр хэлбэл эд эс бүхэн цус ба энергиэр тэжээгддэг. Тэгэхээр таны бодол санаа  эргээд бие организмдаа нөлөөлнө гэсэн үг юм. Зарим хүмүүс бодол санаагаа удирдан эрүүл мэндээ сайжруулдагийн нууц чухамдаа үүнд оршдог билээ. Хүний бие дэх “Чи” энергийн талбай нь  арьсны гадаргуугаас 10– 100 см зайд орших бөгөөд зөвхөн бодол санаа ч бус, гадны маш олон хүчин зүйлсийн нөлөөлөлд орж байдаг. Таны идэж буй хоол хүнс, орчин тойрны эд юмс, барилга байшин, уулзан учирч буй хүний “Чи” энерги өөрийн тань “Чи” энергид нөлөөлдөг гэсэн үг юм. Ялангуяа, барилга байшингийн “Чи” энергийн нөлөөлөл хүний бодол санаа, сэтгэл хөдлөлд хүчтэй нөлөөлдөг. Энэ бол Фэн Шуйгийн үндэс юм. Хамгийн сайн Фэн Шуйтэй орчинд хүмүүс үр бүтээл арвин, санаачлага өндөртэй, ажилдаа анхаарлаа төвлөрүүлж чаддаг, идэвхтэй, шаргуу байдаг билээ.