Канадын Торонто хотын урлагын гайхамшигт бүтээлүүдийн нэг бол яах аргагүй “Гардинер” музей мөн юм. Уг музейн зураг төслийг архитекторч Пэйн МакКенна гүйцэтгэсэн бөгөөд 2008 оны Олон Улсын архитектурын RIBA хэмээх шагналыг хүртжээ.

Архитекторч Пэйн МакКенна энэхүү музейн үндэс суурь дээр түшиглэн орчин үеийн тохилог, өвөрмөгц дизайнтай, шавар вааран урлал хийх томоохон урлангын өрөөнүүдтэй, худалдаа үйлчилгээ явуулах танхимууд, студитэй шинэ музейг байгуулж өгчээ. Энэхүү барилгыг шавар урлалын бүтээлүүдээс сэдэвлэсэн бөгөөд хуучин байгалийн ягаан боржин чулуугаар бүрсэн байсныг нь зориулалтандаа бүрэн нийцэхээр өөрчилж, орчин үеийн гялалзсан шил, хар саарал боржин чулуугаар бүрж шинэчилжээ. Мөн газар доорх машины зогсоол, шинэ орчин үеийн цахилгаан шат, гайхалтай уран хийцтэй шат зэргийг нэмж төлөвлөсөн байна.  Музейн хоёрдугаар давхарт шавар вааран урлалын студи, гуравдугаар давхарт үзэсгэлэн, худалдааны лангуунууд байрлахаар төлөвлөжээ. Уг музейг үзсэн хэн боловч жинхэнэ байгалийн материал, шавар урлалын гайхамшигийг олж харж таашаал авах болно

Дэндүү хуучирч, өнгө загвараа алдсан байшинг яах вэ гэдэг асуудал сүүлийн үед их гараад байгаа. Нураах уу эсвэл засаж янзлах уу? Засаж янзална гэдэг тийм ч амар ажил биш. Гэхдээ үүнийг маш амархан аргаар шийдсэн шилдэг архитектурын нэг бол “Акрон” музей юм. 1899 онд баригдсан энэ музейг архитекторч Кооп Химмелп өөрчилж орчин үеийн гайхамшигт барилгын нэг болгож чадсан байна. Энэхүү байгууламж мөн л 2008 оны Олон Улсын архитектурын RIBA хэмээх шагналыг хүртжээ.

Ер нь зарим музейнүүд багтаамж зай багатай байдаг бол “Акрон” музей маш том цэлгэр бөгөөд бүтээлүүдтийг жинхэнэ байгалийн гэрэлд харах боломжтойгоороо онцлог гэнэ. Музейн ханын ихэнх талбайг цонх эзлэх бөгөөд урлагын бүтээлүүдийг үзэхэд улам ч сайхан харагдах боломжтой ажээ. Ойролцоогоор 1800 хүн багтаах хүчин чадалтай энэ музей дан ганц урлагын бүтээлүүдийг ч биш бас хотыг тольдон харж болохоор хийгдсэн нь тун өвөрмөгц гэнэ. Цонхоор хотын нэгээхэн хэсгийг харж болохуйц байрлалтай, тохилог, орчин үеийн дизайнтай, урлагын бүтээлүүд тавигдсан өрөөнүүд том цэлгэр, үзэгчдын урсгал тодорхой төлөвлөгдсөн гээд музейн давуу талууд их бий. Энэхүү музейд урлагын ертөнцөөр аялахаас гадна архитектурын гайхамшигийг ч бас харах боломж дүүрэн бий.

БАРИЛГА.мн
П.Солонго