Засгийн газрын ордны баруун урд талд байрлах Нийслэлийн Засаг даргын Тамгын газрын байрны ард сүндэрлэж буй өндөх хар шилэн барилга баригдаад багагүй хугацаа өнгөрч байгаа. Энэхүү барилгын ерөнхий архитекторчоор “Арткон констракшн” компанийн инженер Б.Баяраа ажиллажээ.

Улаанбаатар хотын захиргааны байгууллагуудын байрладаг байрнууд энд тэнд байдаг нь иргэд үйлчилгээ авахад нэлээд хүндрэл учруулдаг. Тиймээс эдгээр газрыг нэг цэгт төвлөрүүлж, үйлчилгээг хялбар болгох үүднээс энэхүү барилгыг барьж байгаа юм байна. Нийслэлийн иргэний бүртгэл мэдээллийн алба, Улаанбаатар банкинд байрлах Нийслэлийн захирагчийн алба гэх мэт тарж байрласан бүхий л газрууд нэг дор үйл ажиллагаа явуулах, иргэдэд үйлчилгээг түргэн шуурхай хүргэх боломжтой. Уг барилгын ажил өнгөрөгч зургадугаар сард эхэлсэн бөгөөд “Богда Холдинг” компани тендерт ялснаар гүйцэтгэлийг нь хийж байна. Сантехникийн ажлыг “БТ”, шугам сүлжээг “Энэ”, архитектор болон ерөнхий зураг төслийг “Арткон констракшн” зэрэг компани гүйцэтгэж байгаа бөгөөд нийт 100 гаруй хүн тус барилгыг босгож байгаа юм.

Бидний нүдэнд дассан барилга болох Засаг даргын Тамгын газрын байрлаж буй одоогийн гурван давхар барилгыг ч буулгаж оронд нь дээрх барилгын урд талын хэсэг болох дөрвөн давхар барилга сүндэрлэх нь ээ. Үүний талбайн хэмжээ 84х18 метр квадрат. Түүний ард талд хамгийн сүүлийн үеийн технологиор орчин үеийн дизайн бүхий 16 давхар шилэн барилга босч байна. Талбайн хэмжээ нь 18Х30 метр квадрат. 16 давхар шилэн байшингийн 14 дүгээр давхарт хотын түүхийг харуулсан музей байрлаж, 15 дугаар давхарт ресторан байхаар төлөвлөжээ. Хамгийн дээд давхар буюу 16 дугаар давхар нь бүхэлдээ шилэн давцан байх бөгөөд эндээс хотыг бүхэлд нь харж болох юм байна. Уг барилга нь оффисын зориулалттай учир дотор талын зохион байгуулалт нь заалны зохион байгуулалттай. Төмөр бетон бүтэцтэй шилэн барилга гэдгээрээ их өвөрмөц, барилгын дизайны шинэ шийдэл болж байгаа. Гадна талын шил нь нарны туяанаас хамгаалдаг. Барилгыг босгоход нийт 7.5 тэрбум төгрөг төсөвлөжээ.