Иргэний нисэхийн ерөнхий газрын удирдлага, Монголын урлаг спортын алдартнуудын хөлөглөсөн Eznis airways компанийн онгоц Өмнөговь аймгийн Даланзадгад хотын хатуу хучилттай шинэ нисэх буудалд газардсан анхны онгоц байлаа. Жуулчдын анхаарлыг татсан өмнийн цэнхэр говь ирээдүйд олон улсын шууд нислэгийг хүлээн авна.
Өмнөговь аймгийн Даланзадгад хотын Гурван сайхан хатуу хучилттай шинэ нисэх буудлын нээлтэнд оролцохоор Улаанбаатар хотоос Далай аварга Өсөхбаяр, арслан Мөнх-Эрдэнэ, дуучин Батсайхан зэргийн спорт урлагийн алдартнууд, Иргэний нисэхийн ерөнхий газрын удирдлага Eznis airways компанийн онгоцоор Даланзадгад хотод зочилжээ. Байгалийн үзэсгэлэн бүрдсэн өмнийн цэнхэр говьд ирэх хүсэлтэй жуулчдын тоо өдрөөс өдөрт нэмэгдэж байгаа энэ үед нислэгийн аюулгүй байдлыг хангасан шинэ буудал ашиглалтанд орж байгаа нь цагаа олсон гэж Иргэний нисэхийн ерөнхий газрын удирдлага хэлж байна.
Монгол Улсын Засгийн газар энэ оны 3-р сард тогтоол гаргаж, орон нутгийн 4 нисэх буудлыг олон улсын статустай болгосны нэг нь Өмнөговь аймгийн “Гурван сайхан” нисэх буудал. Иймээс говьд зочлох жуулчид монгол оронтой Өмнөговь аймгаар, Гурван сайхан нисэх буудлаар танилцах мөч удахгүй нь.
Өмнөговь руу нислэг хүлээж хэд хоног саатдаг байсан үе ард хоцорч байна. Энэ оны зуны нислэгийн урьдчилсан хуваарийг харахад агаарын тээвэрлэгч МИАТ, Аэромонголия, Eznis компаниуд Даланзадгад хот руу өдөрт 3-4 нислэг хийх захиалга өгчээ. Даланзадгадын хуучин нисэх буудал 1957 онд байгуулагдсан. Аймгийн төвөөсөө 500 метр зайд байрлаж байсан учраас нислэгийн аюулгүй байдалд сөрөг нөлөөтэй байсан гэнэ. Одоо энэ нутагт гадаад дотоодын жуулчдыг сэтгэл амар хүлээж авах олон улсын стандартад нийцсэн нисэх буудал эрхэм таныг угтаж авна.