Сурв: Сүүлийн үед залуус маань мэргэжил дээшлүүлэх сургалтуудад хамрагдах сонирхол их болсон. Танай “Барилгын коллеж” энэ тал дээр ямар үйл ажиллагаа явуулж байна вэ?
Ц.Доржбалдан: Манайх нийт 8 төрлийн сургалт явуулдаг. Жишээ нь өнгөлгөө засал чимэглэл, өрөг угсрагч, сантехникийн засвар, гагнуур, цахилгаанчин зэрэг мэргэжлүүдээр сургалт явуулдаг. Сургалт маань 30 хоногоор явагддаг.

Сурв: Танайх бас төлбөргүй сургалт явуулдаг гэсэн. Энэ талаараа мэдээлэл өгөөч?
Ц.Доржбалдан:Төлбөртэй сургалт нь 30 хоногийн хугацаатай, 120 цагын хөтөлбөрөөр сураад мэргэжлийн үнэмлэхтэй болно гэсэн үг. Төлбөрийн хувьд 60,000 төгрөг. Харин төлбөргүй сургалт гэдэг нь мэргэжлийн зэрэг ахиулах сургалт бөгөөд 21 хоногийн хугацаатай, 90 цагийн хөтөлбөрөөр сургалт явуулж байна. 

Сурв: Төгсөгчдийн хэдэн хувь нь ажилын байраар бүрэн хангагдаж чадаж байгаа вэ?
Ц.Доржбалдан: 75-80% нь төгсөөд ажилын байртай болж байгаа. Зарим компаниуд мэргэжлийн үнэмлэхгүй ажилчидаа сургаж, мэргэжлийн үнэмлэхтэй болгодог.

Сурв:Танай төгсөгчид ажлын байрандаа гараад хэр сайн ажиллаж чадаж байгаа вэ? Манай зарим барилгын компаниуд Монгол барилгачидыг ажилд авах тийм дуртай биш байдаг.
Ц.Доржбалдан: Тэр тийм тал ажиглагдаад байдаг. Гэхдээ манай залуучууд өөрсдөө сайн ажиллаад, итгэлтэй байж чадвал ажиллуулахгүй гэх үндэслэл огт байхгүй байдаг. Манайх зэрэглэл тогтоож өгдөг л дөө. Тэгээд зэрэглэл ахиад сайн хичээх тусам өндөр цалин авна гэсэн үг юм. Гэтэл манай зарим залуучууд бие биетэйгээ барьцаад, цалингаа голдоод ажил алдагдуулаад байдаг тал бий. Тэгэхгүйгээр хам олонсог байж, сайн ажиллаад ирвэл ямар ч байгууллага сайн ажилтанаа халах сонирхолгүй болно оо доо.

Сурв: Танай төгсөгчидөөс бусдадаа үлгэр жишээ болохуйц сайн ажиллаж яваа төгсөгч байгаа юу?
Ц.Доржбалдан: Байлгүй яахав. Олон бий. Манай төгсөгчид янз бүрийн газар хуваарилагдаад ажил нь урагштай, байгууллагынхаа итгэлийг олоод, багагүй цалин аваад амьдралаа авч яваа залуус олон бий.

Сурв: Сүүлийн үеийн барилгууд дэндүү чанар муутай байна гээд байгаа. Энэнд боловсон хүчин хамааралтай юу? Та энэ тал дээр юу гэж бодож байна?
Ц.Доржбалдан: Манайд үйлдвэрлээд байгаа тоосгыг чанар сайн хангаж чадахгүй болсон байна гээд байгаа. Хуучин үйлдвэрлэж байсан тоосго, одоо үйлдвэрлэж байгаа тоосго хоёрын чанарын ялгаа нэлээд байгаа нь харагддаг. Үүнээс үүдээд л чанар муутай материалаар барихаар чанар муутай барилга л баригдана шүү дээ. Зарим орон сууц хямд төсөрийг нь бодоод муу бариад байна гэдэгтэй би санал нэг байна.

Сурв: Танайх ер нь боловсон хүчинээ бэлтгэхдээ гадаадад сургах сургалт байдаг уу?
Ц.Доржбалдан: Одоогоор Германд л сургалт хийж, хамтран ажиллаж байгаа. Мөн Оросын Иркутск хотын сургуультай, Хятад, Солонгосын сургуулиудтай хамтарч оюутан солилцооны сургалт явуулах гэж байгаа. Цаашдаа гадаад харилцаагаа өргөжүүлэх боломж бий.

Сурв: Төрөөс энэ сургалтуудыг дэмжсэн үйл ажиллагаа явуулж байгаа юу?
Ц.Доржбалдан: Явуулж байгаа. Төлбөрийн чадваргүй залуучуудыг үнэ төлбөргүй сургаж, төлбөрийг нь төрөөс даах тусламж үзүүлж байгаа. Бас тийм сурагчдад унаа, хоолны мөнгө олгодог. Ингэснээр боловсрол эзэмшихийг хүссэн залуусыг дэмжиж, ажлын байртай болгох тал дээр анхаарч ажиллаж байна гэсэн үг юм.

Сурв: Энэ хөнгөлөлтөд хамрагдахыг хүсвэл ямар ямар материал бүрдүүлэх шаардлагатай вэ?
Ц.Доржбалдан: Хорооныхоо нийгмийн ажилтантай уулзаад хүсэлт, өргөдөл гаргана. Үүнийгээ засаг даргаар баталгаажуулаад тухайн дүүргийнхээ Хөдөлмөр Халамж Үйлчилгээний Хэлтэст очиж мэдэгдэх хуудас аваад эрхийн бичиг тарааж байгаа газраа очино. Тэр эрхийн бичгаар бид үнэгүй сургах юм.

Сурв: Одоогоор эрхийн бичгийн сургалтаар хичнээн хүн сураад байгаа вэ? Залуучууд хэр идэвхтэй хамрагдаж байна?
Ц.Доржбалдан: Одоогоор 100 гаруй хүн хамрагдаад байгаа. Ер нь идэвхтэй, сайн сурч байгаа. Тухайн хүн чин сэтгэлээсээ хандаж сурч, ажиллаж чадвал ажлын байр олдохгүйн зовлон байхгүй.