БХБЯ-ны урилгаар Бүгд найрамдах Турк улсын нийтийн аж ахуй, нутагшилт суурьшилтын яамны төлөөлөгч болох НААНСЯ-ны дэд төрийн нарийн бичгийн дарга Садик Ямач, Техник судалгаа, хэрэгжилтийн газрын дарга Dr. Хами Еилдирим, Барилгын асуудал эрхэлсэн газрын дарга Сэфэр Аккаяа, Кадастрын газрын дарга М. Зэки Адли, Гадаад харилцаа, мэргэжлийн сургалт хариуцсан хэлтсийн дарга Фикрэт Өзэр нарын бүрэлдэхүүнтэйгээр манай улсад ажлын айлчлал хийхээр ирлээ. Тэд өчигдөр орой  “Чингис хаан” олон улсын нисэх онгоцны буудалд  буусан бөгөөд манай талаас холбогдох яам тамгын газрын хүмүүс болон БНТУ-аас монгол улсад суугаа бүрэн эрхт сайд Өмүл Шөлэндил нар угтан авсан байна. Төлөөлөгч нар маань энэхүү айлчлалаараа өөрийн орны барилгын салбарт мөрдөгддөг хууль эрх зүйн , хот төлөвлөлт, барилгын норм нормативын талаар мэдээлэл өглөө. Дэлхий дээр хамгийн хурдан баригддаг барилгын технологийг нэвтрүүлсэн туркчууд манай орны барилгын салбарт  хөрөнгө оруулалт хийхээс гадна томоохон бүтээн босголтонд гар бие оролцоно гэдгээ хэлж байлаа. Энэ нь барилгын салбарт төдийгүй манай улсын ирээдүйн хөгжилд их хувь нэмэр оруулж байгаа явдал юм. Хурлын үеэр НААНСЯ-ны дэд төрийн нарийн бичгийн дарга Садик Ямач : “ Манай улсын барилгын салбар 150-н жилийн түүхтэй. Эртний түүхээрээ холбогддог Монгол улстай хамтран ажиллах болсондоо таатай байна. Бид БХБЯ-тай болоод барилгын салбарын мэргэжилтэн бэлтгэхэд хамтран ажиллахад бэлэн байна “  гэж хэлсэн юм.