Барилга МН

Барилга.МН 2008 оны 10-р сарын 15-ны өдрийн 15-н цагт Үл Хөдлөх Хөрөнгө Зуучлалын байгууллагуудын уулзалт семинарыг “Рокмон” оффисийн төвд зохион байгууллаа. Уг уулзалт семинарт:

1. Зах зээлийн чиг хандлага
2. Үл Хөдлөх Хөрөнгө Зуучлал 2008 үзэсгэлэн яармаг
3. Үл Хөдлөх Хөрөнгө Зуучлал, худалдаалагчдын төрийн бус байгуулгыг байгуулах тухай зэрэг асуудлуудыг авч хэлэлцлээ.

2008 оны 9-р сарын байдлаар инфляци 34% буураад байгаа учир үл хөдлөх хөрөнгийн худалдаа, зуучлал ч мөн зогсонги байдалд ороод байгаатай холбогдуулан уулзалтыг зохион байгуулсан бөгөөд уг семинарын гол зорилго нь Үл Хөдлөх Хөрөнгө Зуучлалын байгууллагуудын нэр хүндийг өсгөх, зөв сурталчилах, зах зээлийн эдийн засгийг тогтворжуулах, үл хөдлөх хөрөнгийг худалдан авах сонирхолыг бий болгох, Үл Хөдлөх Хөрөнгө Зуучлалын байгууллагуудын Холбоог байгуулах зэрэг өргөн хүрээг хамарч, олон нийтэд хүрч ажиллах зорилготой байв.

            Уулзалт семинарт Үл Хөдлөх Хөрөнгө Зуучлалын “Гурван тулга инвест”, “Фүжи бик”, “Патар”, “Инфо хаус”, “Сакура Проперти” , “Номин”, “Ди Эйч Пи Эн”, “Демозу”, “Ерөө бид”, “Реалтор”, “Нью эксперт”, “Тэнхлэг зууч”, “Үйлс” зэрэг олон байгууллагууд оролцсоноос “Демозу”, “Патар”, “Үйлс”, “Ерөө бид”, “Реалтор”, “Сакура Проперти”, “Ди Эйч Пи Эн”, “Фүжи бик”, “Нью эксперт” зэрэг байгууллагууд Үл Хөдлөх Хөрөнгө Зуучлалын Холбоог байгуулах, дүрэм боловсруулах ажлын хэсэгт орж ажиллахаар боллоо.

            Уулзалт семинарын үеэр Үл Хөдлөх Хөрөнгө Зуучлалын байгууллагуудын төлөөлөгчид, захиралууд холбоо байгуулах талаар төдийгүй "Үл Хөдлөх Хөрөнгө Зуучлал-2008" үзэсгэлэн яармагийн талаарх өөрсдийн санаа бодлоо чөлөөтэй илэрхийлж, хамтран ажиллахаар тохиролцов. Энэ үеэр

• Үл Хөдлөх Хөрөнгө Зуучлалын байгууллагуудын талаарх дэлгэрэнгүй цогц мэдээллийг олгодог вэб сайт нээх
• Олон нийтэд байнга шинэлэг үнэн зөв мэдээлэл өгч байдаг сонинтой болох
• Нэгдсэн телевизийн сувагтай болох
• Гадаадын зах зээлээс суралцах, сургалт явуулах
• Үл Хөдлөх Хөрөнгө Зуучлалын байгууллагуудын анхдугаар чуулга уулзалтыг зохион байгуулах
• Мэргэжлийн реалторын талын боловсон хүчинг бэлтгэх
• Олон улсын Үл Хөдлөх Хөрөнгө Зуучлалын байгууллагуудын үзэсгэлэн яармагт идэвхтэй оролцож байх, энэ тал дээр судалгаа шинжилгээг сайн хийх
• Олон нийтэд хандсан үйл ажиллагааг байнга явуулж байх зэрэг олон шинэ санаануудыг дэвшүүллээ.

            Ингээд Үл Хөдлөх Хөрөнгө Зуучлалын байгууллагууд 2008 оны 11-р сарын 11-14-ны хооронд Барилга. МН-ээс зохион байгуулж буй Үл Хөдлөх Хөрөнгө Зуучлал 2008 үзэсгэлэн яармагт идэвхтэй оролцоно гэдгээ мэдэгдлээ.