Улаанбаатар хотод 40 мянган айлын орон сууц эхнээсээ ашиглалтад орж байгаа чихэнд чимэгтэй мэдээ дуулдаж байгаа ч хөдөө орон нутагт энэ нь сураг тасрахаа шахаж байна.

                2006 оны 11 дүгээр сард ашиглалтад орох байсан Мандалговь хотод барьж буй 40 айлын орон сууцны ажил "яст мэлхийний хөдөлгөөнөөр" урагшилж байна. Энэ онд ашиглалтад орж бас л амжихгүй нь. Үүний гол шалтгаан нь санхүүжилт тасалдан удааширсантай холбоотойг гүйцэтгэгч компани хэлж байна.

                40 айлын орон сууцны сурагаар 1000 төгрөгийн хураамж төлөн өргөдөл хүсэлтийн маягт бөглөж өгсөн иргэд цөхрөнгөө баржээ. Өргөдөл хүсэлтийнхээ дагуу учрыг лавлая гэсэн ч иргэд өнөөдөр чухам хэнд хандахаа мэдэхгүй байгаа аж. Тухайн үед иргэдийн хүсэлтийг шинээр байгуулагдсан барилга хот байгуулалтын алба хүлээн авч байсан аж. Харин одоо энэ алба ажиллах боловсон хүчингүйгээс үүдээ бариад байна. Учир нь тэнд ажиллагсадын зарим нь архи ууж ажлын хариуцлага алдсан гэдгээр, зарим нь өөрийн хүсэлтээр ажиллах боломжгүй болсон аж.

                40 айлын зориулалттай байсан сууц нэг айлд ногдох зай талбайн хувьд дэндүү чамлалттай байсныг мэргэжилтнүүд 30 айлынх болгосноор шийдэж,нэг айлд ногдох талбайн хэмжээ эрхбиш том болсон ч хэзээ ашиглалтад орж бэлэн болох нь тодорхойгүй хэвээр, дээд давхраасаа өрлөг нь дөнгөж эхлээд байна.