Барилга МН

Зураач, барималч Г. Сэрээтэр нь 1958 онд төрсөн. 1978 онд Дүрслэх Урлагийн дунд сургууль, 1986 онд хуучнаар Чехословак улсын Прага хотноо Дүрслэх Урлагийн Их сургуулийг тус тус төгсжээ.

• 1990 онд “Монголын нууц товчоо” номын 750 жилийн ойд зориулсан үзэсгэлэн
• 1992 онд “Орон зай”
• 1998 онд “Дуу хоолой”
• 2003 онд “Миний хайртай морь” зэрэг өөрийн уран бүтээлийн олон үзэсгэлэнг гаргаж байжээ.

Тэрээр Монголын Урчуудын Эвлэлийн шагналыг 1998 онд, 1999 онд “Орон зай” үзэсгэлэнгээрээ “Мөнгөн бүс” шагналуудыг тус тус хүртэжээ.

      Барималч Г. Сэрээтэр 2008 оны 10-р сарын 15-наас 21-ийг хүртэл 50 насныхаа ойд зориулан өөрийн бие даасан үзэсгэлэнгээ МУЭ-ийн “Art” галерейд зохион байгууллаа. Уг үзэсгэлэнд түүний уран бүтээлдээ хамгийн их тусгах дуртай хүлэг морь, байгаль дэлхий, эмэгтэй хүний гоо сайхныг харуулсан бүтээлүүдээ түлхүү гаргасан байлаа. Тэрээр ямар нэгэн урсгал, чиглэлд баригдалгүй зөвхөн өөрийн үзэл бодол, өөрийн ертөнцийг бодит орчинтой уялдуулан бүтээлээ туурвидгаараа онцлог уран бүтээлчийн нэг юм.

      Түүний бүтээлүүд өнгө төрх, өгүүлэмжээрээ нууцлаг ч юм шиг хэрнээ утга агуулга нь гүн, өнгөний шийдэл нь байгалийн өнгийг харуулсан, бодит өнгө аястай байв. Уг үзэсгэлэнг үзэж байгаа хүмүүсийн сэтгэгдэл маш өндөр байсан бөгөөд түүний хүлэг мориний барималууд үзэгчдийн сэтгэлийг ихээхэн татаж байсан юм.