2008 оны 10-р сарын 20-ны өдөр Барилга, Хот Байгуулалтын Яаманд нээлттэй өдөрлөг боллоо. Уг өдөрлөгт БХБЯ, Барилга, Хот Байгуулалт Нийтийн Аж Ахуйн Үндэсний Төв, МУ-ын засгийн газрын хүн амыг орон сууцаар хангах төсөл, ЗТБХБЯ, ЗТАЖЯ, Авто Замын Хяналт Судалгааны Төв, Нийслэлийн Мэргэжлийн Хяналтын Газар, Монголын Иргэний Агаарын Тээвэр зэрэг байгууллагууд байгууллагынхаа үйл ажиллагааг иргэдэд дэлгэрэнгүй танилцуулж, сонирхсон асуултанд нь хариулт өгч байлаа.

Нээлттэй өдөрлөгт БХБЯ, БХБНААҮТ зэрэг байгууллагууд иргэдийн хамгийн их сонирхож байгаа газрын асуудал, 40000 айлын орон сууц хөтөлбөр, барилга орон сууц, материалын чанарын талаар зэрэг сонирхсон асуултанд нь дэлгэрэнгүй хариулт өглөө.

БХБНААҮТ-ийн стратегийн зорилго нь:

Нутагшилт, суурьшил, хот байгуулалтын бодлогыг боловсруулах, хэрэгжүүлэх, зохион байгуулахад мэргэжлийн зөвлөгөө, мэдээлэл дэмжлэгээр хангах

Хот байгуулалтын ерөнхий төлөвлөгөө, төслийг боловсруулах, хэрэгжилтийг хангуулахад мэргэжлийн зөвлөгөө, мэдээлэл, дэмжлэгээр хангах

Архитектур, зураг төсөл, хайгуул судалгааны бодлого, үйл ажиллагааны хөгжлийн чиг хандлагыг боловсруулах, хэрэгжүүлэхэд мэргэжлийн зөвлөгөө мэдээллээр хангах

Барилга угсралт, барилгын материалын үйлдвэрлэлийн бодлого, үйл ажиллагаа, хөгжлийн чиг хандлагыг хэрэгжүүлэх

Болзошгүй газар хөдлөлтийн гамшгаас урьдчилан сэргийлэх арга хэмжээг боловсруулах, мэргэжлийн зөвлөгөө өгөх зэрэг томоохон үйл ажиллагааг явуулдаг байгууллага юм.

·         Барилгын чанар, аюулгүй байдлын газар

·         Хот байгуулалт, зураг төслийн хэлтэс

·         Барилга, барилгын материалын хэлтэс

·         Норм, нормативийн хэлтэс

·         Нийтийн аж ахуйн хэлтэс

·         Сургалт, судалгаа мэдээллийн хэлтэс

·         Захиргаа, санхүүгийн хэлтэс зэрэг хэлтэсүүд байдаг.

БХБ-ын салбарын хүрээнд шинээр байгуулагдах ерөнхий төлөвлөгөөнүүд:

Тавантолгой, Оюутолгой зэрэг стратегийн томоохон орд газруудыг түшиглэсэн орчин үеийн шийдэл бүхий 10-20000 хүнтэй ерөнхий төлөвлөгөө боловсруулах

Хөшигтийн хөндийн олон улсын нисэх буудлыг түшиглэсэн ерөнхий төлөвлөгөө боловсруулах

Үйлдвэрлэл, үйлчилгээ, хотуудын инженерийн дэд бүтцийг сайжруулж, амьдрах, ажиллах орчинг бүрдүүлэх зэрэг ажилуудыг хийхээр төлөвлөжээ.

Орон сууцны санхүүжилтийн корпораци нь СЭЗЯ, БХБЯ, НЗДТГ хамтран хүн амыг орон сууцаар хангах төрийн бодлого, хөтөлбөрийг хэрэгжүүлэх, орон сууцны урт хугацаат зээл, хөрөнгө оруулалт, санхүүжилтийн цогц үйл ажиллагааг шийдвэрлэх үүрэг зорилготой.

      Одоогийн байдлаар хөтөлбөрт оролцогч “Голомт банк”, “Капитал банк”, “Монгол шуудан банк”, “Анод банк”, “Улаанбаатар хотын банк” зэрэг таван арилжааны банкаар дамжуулан 278 иргэнд 4,6 тэрбум төгрөгийн зээл олгоод байна.

     Хөдөө орон нутагт 10 аймгийн 34 суманд 204 айлын сууц ашиглалтанд орсон ба 9 аймгийн 23 суманд 116 айлын орон сууц баригдаж байгаа ажээ.