Энэ айлчлалын бэлтгэл ажлыг хангах зорилгоор холбогдох албаны хүмүүс Москва хотод ажиллаад иржээ. Ажлын хэсэгт яваад ирсэн УСУГ-ын дарга Б.Пүрэвжаваас уулзалтын үеэр ярилцсан зарим асуудлын талаар тодруулсан юм.

-Ямар зорилгоор Москва яваад ирэв?

-Нийслэлийн Засаг даргын удирдамжийн дагуу Улаанбаатар хотын Ерөнхий менежер Ч.Бат, Тамгын газрын Гадаад харилцаа хамтын ажиллагааны дарга Ц.Батхүү, Цахилгаан тээвэр компанийн захирал Ганбаатар бид нар хоёрдугаар сарын 15-20-ны өдрүүдэд Москва хотод ажиллаад ирлээ. Энэ ажлын хэсэг Москва хотын Засгийн газар Улаанбаатар хотын Засаг даргын Тамгын газар, Захирагчийн Ажлын Албаны хоорондын хамтын ажиллагааны гэрээ, төлөвлөгөөг тодотгох, хийсэн ажлаа дүгнэх, ирэх дөрвөн жилд хийх ажлаа ярилцаж тохирсон. 2009-2011, 2011-2012 он гэсэн хоёр үе шаттайгаар ажил төлөвлөж, зохион байгуулж явуулахаар боллоо. Удахгүй Монгол улсын Ерөнхий сайд Москвад айлчилна. Үүний дараа нийслэлийн Засаг дарга бөгөөд Улаанбаатар хотын захирагч Г.Мөнхбаяр Москва хотын мэрийн урилгаар ажлын айлчлал хийнэ. Энэ айлчлалуудын ялангуяа хотын даргын айлчлалын урьдчилсан бэлтгэл ажлыг хангахад түлхүү анхаарлаа. 

-Та өөрийн салбарын хүрээнд ямар асуудал хөндөв? Хэрхэн шийдэгдсэн вэ? 

-Монгол улсын Ерөнхийлөгч Москвад албан ёсны айлчлал хийж, Москва хотын мэр Юрий Лужковтой уулзахдаа Улаанбаатар хотын ус хангамжийн асуудлыг хөндөж ярилцсан юм.  

Энэ асуудлыг судалж, ярилцлаа. Туул гол дээр далан барьж, тэндээс гадаргын усыг ашиглаж, нийслэлчүүдийн хэрэгцээг хангах зорилготой төслийг 1980-аад оны үед тухайн үеийн ЗХУ-ын холбогдох байгууллагууд хийж боловсруулсан байдаг. Харин хэрэгжүүлэх шат нь 1990 онтой золгосон учраас түр хойшлогдоод байсан. Тиймээс энэ төслийг эргэж харах зорилгыг бас агуулсан. Бүх холбоотын зургийн институтын удирдлагуудтай уулзаж ярилцаад одоогийн энэ нөхцөл байдалд тохируулан, хоёр талдаа харилцан ашигтай байх үндсэн дээр шинэчилж зураг төслөө боловсруулах, барьж байгуулах, ашиглах зэрэг асуудлуудыг хөндсөн. Харин нарийвчилсан асуудлыг хотын дарга тус улсад айчлахдаа ярилцаж тохирно. 

-Энэ төсөл хэзээнээс хэрэгжиж эхлэх вэ? Манайд өгөх ач холбогдлын талаар тодруулахгүй юу? 

-Москва хот гэхэд Москва гол, Волга мөрнөөс нийтдээ 13 далан бариад хоногт 5.5 сая шоо метр усыг хэрэглээндээ ашиглаж байна. Тэгэхээр энэ нь гадаргын усыг хэрэглээнд ашиглах ач холбогдолтой. Улаанбаатарын усан хангамж, хүрэлцээ одоохондоо хүндрэлтэй болоогүй. Нийслэл хотод хэрэгцээтэй усыг олборлож түгээгээд явж байна. Харин цаашдаа барилгажих үйл явц эрчимтэй хөгжих төлөвлөгөөтэй байгаа болохоор гадаргын усыг боож, хуримтлуулан усан сан байгуулж тэндээс хэрэгцээгээ хангах шаардлага зайлшгүй тулгарна. Тиймээс ч энэ төслөө өнөө маргаашгүй эхэлчих зорилго агуулаагүй. 

Зураг төсөл боловсруулна, барилгын ажил хийнэ, ашиглалтад оуулна гээд 5-8 жилийн хугацаа шаардагдана. Төслийн бүрэлдэхүүн нь ус хуримтлуулах далан, эрчим хүч боловсруулах цахилгаан станц, цэвэрлэж шүүдэг станц, түгээх шугам зэрэг обектуудаас бүрдэнэ. Эдгээр тоног төхөөрөмжийг ОХУ-д үйлдвэрлээд шаардлагатайг нь гуравдагч орноос импортоор авах шаардлага гарна. Хэдийгээр одоо ус хангалттай байгаа ч гэсэн бид ирээдүйгээ бодоод өнөөдрөөс энэ ажлаа ярилцаж байх ёстой. Одоохондоо эцсийн байдлаар яригдаагүй байгаа болохоор энэ ажлыг эхлүүлэхийн төлөө хөөцөлдөж л байна. Их ажлын дөнгөж эхний цэг дээр л байна даа.