Хээр тал газар болсон болохоор газар хөдлөлтөөс ямар нэгэн хохирол учраагүй хэмээн холбогдох албаны хүмүүс мэдээлж байна. 

Энэ талаар Одон орон, геофизикийн судалгааны төвийн Газар хөдлөлт судалгаа секторын эрхлэгч М.Өлзийбатаас тодруулсан юм.

-Өвөрхангайд болсон газар хөдлөлтийн улмаас ямар нэгэн хохирол учирсан талаар мэдээлэл ирсэн үү? Ер нь ийм хэмжээний хүчтэй газар хөдлөлт урьд нь болж байсан уу?

-Өвөрхангай аймгийн Баруунбаян-Улаан сумаас 20 километр орчмын зайд 5.2 магнитут, газрын гадаргууд үйлчилсэн үйлчлэлээр бол зургаагаас долоон балл орчмын хүчтэй газар хөдлөлт гурваас дөрвөн давтамжтай болсон. Энэ нь тийм ч хүчтэйд тооцогдохгүй. Монгол нутагт үе үе болж байдаг тийм л дундаж хүчтэй газар хөдлөлт. 1957 онд болсон хүчтэй газар хөдлөлтийн нэг салбар нь гэж хэлж болох юм. Аймгийн төвдөө бага зэрэг мэдрэгдсэн байна лээ. Ямар ч байсан газар хөдлөлтийн бүсдээ бол газрын гадарга дээр ямар ч чулуугүй болсон гэсэн.

-Хэдий хэмжээний талбайг хамарсан юм бол? Танайхаас тэнд очиж судалгаа хийх үү?

-Ямар талбайг хамарсныг судалж байж л тогтооно. Газрын гадарга, хүнд хэрхэн нөлөөлсөн зэрэг олон хамаарлыг судлах хэрэгтэй. Тийм ч хүчтэй газар хөдлөлт биш, бас бидний хөрөнгө мөнгөний бололцооноос шалтгаалаад очиж судлах тийм боломж одоогоор алга.

-Хэрэв Улаанбаатар хот юм уу, хот суурин газар таарсан бол ямархуу хохирол амсах вэ?

-Тийм ч хүчтэй биш дундаж газар хөдлөлт гэж түрүүн хэлсэн. Хэрэв хот суурин газар болсон бол байшингуудын шавар унах зэргээр эвдрэл гэмтэл гарах байсан. Өөрөөр хэлбэл хүн амьтан айлгаж, барилга байшинд ан цав үүсч гэмтэл учруулахаас биш эвдрэл сүйрэл дагуулах тийм хэмжээний хүчтэй газар хөдлөлт биш юм.

Улаанбаатар Таймс