Гэр хорооллын айл өрхийг цахилгаанаар хүрэлцэхүйц хэмжээнд хангаж чадахгүй байгаа төдийгүй Улаанбаатар хотын хэмжээнд гурван мянга орчим айл өрх цахилгаангүй байна. БЗД-ийн Цайзын зургадугаар хэсэг, Моносын гудамж зэрэг газарт 2895 өрхийн цахилгааны хүчдэл муу байгаагаас цахилгаан хэрэгслүүд ажиллуулахад бэрхшээлтэй байгаа гэнэ.

 Нийслэлийн цахилгааны ачаалал ихээхэн өсч, гол хэрэглээг хангадаг 110 кв-ын "Баруун", "Умард", "Өмнөд", "Туул", "Дорнод-2" дэд станцууд суурилагдсан хүчин чадлынхаа дээд хязгаарт хүрч, шинээр хэрэглэгч холбох боломжгүй болсноос гадна холбогдсон хэрэглэгчийн ачааллын өсөлтийг даахгүйд хүрээд байгаа юм байна. 2009 онд улсын төсөв, Монгол улсыг хөгжүүлэх сангаас 7,6 тэрбум төгрөгийн хөрөнгө оруулалт хийх аж. Мөн өөрийн хөрөнгөөр гүйцэтгэн дараа төлөх нөхцөлтэйгээр Улаанбаатар хотын кабель шугамын шинэчлэлд 7,8 тэрбум төгрөг зарцуулах тооцоо гараад байна. Цаашид Улаанбаатар хотын өсөн нэмэгдэж буй цахилгаан эрчим хүчний хэрэглээг хангахад 92 тэрбум төгрөг шаардлагатай байгаа гэнэ.