УИХ-ын гишүүн, Монгол Улсын Засгийн газрын гишүүн, Зам, тээвэр, барилга, хот байгуулалт (ЗТБХБ)-ын сайд Х.Баттулга 2009 оны 1 дүгээр сарын 12–15-ны өдрүүдэд ХБНГУ-ын Холбооны Тээвэр, барилга, хот байгуулалт (ТБХБ)-ын сайд В.Тийфензээ-н урилгаар ХБНГУ-д ажлын айлчлал хийж байна.

Айлчлалын үеэр Холбооны ТБХБ-ын сайд В.Тийфензээ ЗТБХБ-ын сайд Х.Баттулгыг өөрийн яаманд хүлээн авч уулзан, хоёр яамдын хамтын ажиллагааны талаар дэлгэрэнгүй ярилцаж, уулзалтын төгсгөлд сайд нар “Монгол Улсын ЗТБХБЯ, ХБНГУ-ын Холбооны ТБХБЯ-д хоорондын хамтын ажиллагааны тухай хамтарсан санамж бичиг”-т гарын үсэг зурлаа. Уг санамж бичигт талууд монгол-германы иж бүрэн түншлэлийг өргөжүүлэх, хоёр талын харилцааг гүнзгийрүүлэх, зам, тээвэр, барилга, хот байгуулалтын салбарын хамтын ажиллагааг хөгжүүлэх, дэмжих зорилготой байгаагаа илэрхийлэв. Уулзалтад ЗТБХБ-ын сайдыг дагалдан яваа төлөөлөгчдийн бүрэлдэхүүнээс гадна Монгол Улсаас ХБНГУ-д суугаа Онц бөгөөд Бүрэн эрхт Элчин сайд Т.Галбаатар, ЭСЯ-ны зөвлөх Б.Даваадорж нар байлцав. Уулзалтын дараа Холбооны сайд Тийфензээ Х.Баттулга сайдыг хүндэтгэж оройн зоог барив.

ЗТБХБ-ын сайд Х.Баттулга Холбооны Эдийн засаг, технологийн яамны парламентийн төрийн нарийн бичгийн дарга В.Пфаффенбах болон Германы орон сууцны барилгын үйлдвэрлэлийн төв холбооны дарга Проф. К.Повл, Дойче банкны гүйцэтгэх захирал Е.М.Отте зэрэг германы өндөр албаны хүмүүстэй уулзаж, улс орныхоо өнөөгийн байдлын талаар товч мэдээлэл өгөхийн зэрэгцээ өөрийн хариуцсан салбарт хоёр орны хамтын ажиллагааг эрчимжүүлж, түүнээс бодитой үр дүн хүлээж байгаагаа илэрхийлж байлаа. Тэрээр өнөөдөр германы төмөр замын байгууллага “Дойче Баан”-ын ерөнхий захирал Др.Х.Мээдорнтой болон албаны бусад хэд хэдэн хүнтэй ажлын уулзалт хийгээд 15-ны өдрийн үдээс хойш эх орноо зорин нисэх юм.