“Хүн төрөлхтөн үүнээс илүүг бодож чадсангүй” гэх сүрхий хэлц бий. Сонгон шалгаруулалт буюу тендер дагасан гомдлын үед энэ үгийг хэлмээр санагддаг. Нэг нь ялж нөгөөх нь ялагддаг болохоор энэхүү үйл ажиллагааг дагасан нэхэл хатуу гомдол байнга байдаг. Их мөнгө цаашлаад олон арван хүний амьдрал холбогддог болохоор тендер дагасан “амбийц” хөвөрнө дөө. Будилаантай ч гэх үү булхайтай ч гэх үү нэг сонгон шалгаруулалтын тухай өгүүлэх гэсэн юм.

Монголд орчин үеийн хүн эмнэлгийн анхны суурийг тавьсан Улсын клиникийн төв эмнэлгийг өргөтгөх шийдвэр гаргасан нь тус байгууллагын олон ажилтныг баярлуулжээ. Ганц энэ эмнэлэг ч биш тус байгууллагаар үйлчлүүлдэг олон мянган иргэн энэхүү мэдээг сонсоод хөөрцөглөсөн нь лавтай. Гэвч сайныг дагасан саар мэдээ олныг түгшээлээ. Улсын клиникийн төв эмнэлэгийн оношлогоо, мэс заслын төв болох барилгын зураг төсөл шалгаруулах тендер дээр будилаан гарчээ.

Барилгын инженерийн зургийг шалгаруулах тендерт гурван компани оролцсоноос “Тэнхлэг тулгуур” компани ялжээ. Гэтэл “Ти энд Жи” компаниас энэхүү сонгон шалгаруулах явдлыг эргэн харж, үнэлгээний хорооны үйл ажиллагааг нягтлан шалгах шаардлагатай гэж үзэж байна. Тус компаниас явуулсан саналыг хүчингүйд тооцож “техникийн саналд авах доод оноонд хүрээгүй” гэсэн хариу мэдэгдлийг явуулжээ. Тэгсэн атлаа тус байгууллагын үнийн саналыг тус эмнэлгийн ажилтнууд мэдэж байсан нь “Ти энд Жи” компанийн захирал Н.Цогтоог гайхшруулжээ.

Төрийн болон орон нутгийн өмчийн хөрөнгөөр бараа, ажил, үйлчилгээ, худалдан авах тухай хуульд санхүүгийн саналыг нээлгүйгээр буцаах ёстой байдаг аж. Тендерийн комисс битүүмжилсэн дугтуй дотроос үнийн саналыг аваад үзчихсэн гэдгийг тус компанийнхан баталж байна

Түүгээр ч зогсохгүй Тендерийн хорооны зарим ажилтнууд болон тус эмнэлгийн дарга асан Г.Сонин ХБНГУ улс руу явсан нь хардлага төрүүлж байгаа гэнэ. Үүнийг “Сетунари” компанийн захирал н.Энхтуяатай холбоотой гэх мэдээлэл байх юм. Энэ компани өмнө нь Улсын клиникийн төв эмнэлэгт 341 сая төгрөгийн лаборатори нийлүүлж байжээ. Хэдийгээр энэ компани нь “ROCHE” гэх дэлхийд гайхагддаг фирмийн лабораторийг оруулж ирсэн ч сонгон шалгаруулалт нь “но”-той гэлцэх юм.

Энэ хатагтай өргөтгөлийн барилгатай холбогдох болсон нь сонин. Тус эмнэлгийн зүүн жигүүрийг буулгаж суурин дээр нь 300 ортой 6-8 давхар барилгыг хүзүүвчээр холбон барих зураг хийгджээ. Улсын төсвөөс энэхүү барилгад зориулж хоёр тэрбум 600 сая төгрөг гаргах гэнэ. Эмнэлэг, үйлчилгээний иж бүрэн цогцолбор барихад ийм хэмжээний мөнгө хаана нь ч хүрэхгүй нь тодорхой. Гэтэл Герман улс руу явсан тендерийн хорооны эмч нарт н.Энхтуяа “Суурийг нь л босгочих юм бол Германы хөрөнгө оруулалтаар босгоод өгчихнө” гэж амласан аж. Тэр ч бүү хэл барилгын зураг төслийг Германы ижил төрлийн зориулалттай байгууламжийн зургийг авч ирээд “Тэнхлэг тулгуур” компанийн өмнөөс сонгон шалгаруулалтад оролцсон гэх.

Улсын клиникийн төв эмнэлгийн эмч ажилтнууд үүнд түгшиж байгаа гэнэ. Хаяа залгаа байх БНСУ-ын хөрөнгө оруулалттай “Сонгдо” эмнэлэг мөн л ийм замаар анх баригдаж байжээ. Анагаах ухааны их сургуулийн (хуучин нэрээр) бааз эмнэлэг нэртэй баригдаж эхлэхдээ тус сургуулийн оюутнуудаас хүртэл арав арван мянган төгрөг хандивлаж байжээ. Түшиц эмнэлэгтэй болно гэж хөөрцөглөсөн эмнэлгийн удирдлагууд өөрсдийнхөө сургуулийн мэдлийн газраас хүртэл тасалж өгсөн түүхтэй.

Иргэдэд эрүүл мэндийн үйлчилгээ ойртоод муу нь юу байх вэ гэж та бодож байна уу. Тэгвэл олон арван эмч, эмнэлгийн ажилтан, багш, оюутны идэвх зүтгэлээр баригдаж байсан энэ байгууллага өдгөө солонгос эмч нарын мэдэлд очсон. Тийшээ орж буй хөрөнгө мөнгө ч мөн л гадагшаа хөвөрч байгаа.

Тус эмнэлгийн дэргэд шинээр баригдах оношлогоо, мэс заслын төвийг ийм нөхцөл хүлээж байгаа гэх зовнил хаа сайгүй байна. Үнэхээр Германы хөрөнгө оруулагчид ийм том хөрөнгө оруулалтыг бэлэг болгочихоод буцах нь юу л бол. Баригдаагүй байхдаа л булхай дагуулсан тендерийн маапаан эцэстээ юу болох бол.