Цутгамал арагт бүтээцтэй барилгын угсралтын явцад гарч буй чанарын доголдол, зөрчлийг арилгах, барилгын талбай дээр үйлдвэрлэлийн бусаргаар чанаргүй бетон бэлтгэж байгаа үйл ажиллагаг зогсоох зорилгоор барилга угсралтын үйл ажиллагаа эрхэлдэг аж ахуйн нэгж, барилгын материалын үйлдвэрийн захирал, ерөнхий менежер нарт даалгах нь:

НЭГ. Барилга угсралтын үйл ажиллагаа эрхэлж буй барилгын байгууллага, аж ахуйн нэгжүүдийн захирал, ерөнхий инженер нарт:

1. Барилга угсралтын явцад бетон зуурмаг бэлтгэх ажилд шаардлагатай элс, хайрга, дайргыг барилгын суурь талбайн ухсан шороо, жалга, судаг зэрэг дурсын газраас авч ашиглаж байгааг таслан зогсоох
2. Гарал үүслийн тодорхойлолтгүй, тохирлын гэрчилгээгүй, удаан хугацаагаар болон хадгалалтын технологи алдагдаж идэвхжил нь буурсан, чанар муу цементийг аж ахуйн нэгж, хувь хүмүүсийн гар дээрээс авч хэрэлгэхийг бүрэн зогсоох
3. Зөвхөн чанарын баталгаатай цемент хэрэглэж, бетоны ажлын цутгалт бүрээс сорилт хяналтын шоо авч бат бэхийг нь итгэмжлэгдсэн лабораториудаар шинжилгээ хийлгэж, баталгажуулж хэвших
4. Барилга угсралтын ажлыг гүйцэтгэсэн өдөр тутмын тэмдэглэлийн хөтлөлтийг тогтмолжуулж, бетоны цутгалтын чанар, хяналтын шоо авалт, түүний шинжилгээний үр дүнг нягт нямбай, тодорхой бичдэг болгож хэвшүүлэх.
5. Барилгын талбайд бетон зуурмаг үйлдвэрлэх хэмжигч /тугнуур/ бүхий бага оврын механик болон автомат ажиллагаатай зөөврийн иж бүрэн тоног төхөөрөмж ашигладаг туршлагыг үйлдвэрлэлд нэвтрүүлэх чиглэлээр тодорхой ажил зохион байгуулах
6. Арагт бүтээцтэй барилгын бетоны цутгалтын ажлыг чанарын өндөр түвшинд, технологийн дагуу гүйцэтгэхийн тулд бүтээгдэхүүний чанарын тохирлын гэрчилгээ бүхий бетон зуурмагийн төрөлжсөн үйлдвэр, аж ахуйн нэгжтэй гэрээний үндсэн дээр бетон зуурмаг авч, цутгалтыг тасралтгүй технологиор гүйцэтгэдэг туршлагыг нэвтрүүлэх арга хэмжээ авах
7. Барилгын байгууллага нь өөрийн мэргэжилтэй ажилчдын 90 хувийг мэргэжлийн сургалт үйлдвэрлэлийн төв төгссөн мэргэжлийн үнэмлэх болон улсын хэмжээнд зохион байгуулж байгаа мэргэжлийн ур чадварын шалгалтад орж баталгаажуулалтын гэрчилгээ авсан ажилчдаас бүрдүүлэх зохион байгуулатлын арга хэмжээ авах

ХОЁР. Цементийн үндэсний үйлдвэрүүд болон элс, хайрга, дайрга зэрэг дүүргэгч материал үйлдвэрлэдэг барилгын материалын үйлдвэрийн захирал, ерөнхий инженер нарт:

1. Улаанбаатар хотын үйлдвэрлэл зөвшөөрөгдсөн бүсэд задгай цемент хүлээн авах, борлуулах техник, технологийн иж бүрдлийг хангасан төхөөрөмж бүхий албан ёсны борлуулагчтай болох арга хэмжээг дэс дараалалтай авч хэрэгжүүлэх.
2. Задгай цемент иргэдэд худалдан борлуулахыг тодорхой үе шаттайгаар багасгаж, савалж худалдах горимд шилжих арга хэмжээг авах
3. Бетон зуурмагийн дүүргэгч материалын чанарыг сайжруулж, ялангуяа бетоны элсийг угааж цэвэрлэх, бутлах хайргыг стандартын дагуу ширхэглэлээр ангилах, зөв хэлбэртэй бутлах, уулын чулууг бутлан хурц ирмэгтэй дайрга үйлдвэрлэж зах зээлийн эрэлт хэрэгцээг  хангах чиглэлээр менежментийн тодорхой арга хэмжээ авах

БХБЯамны Сайд: Ж.НАРАНЦАЦРАЛТ